I League-ah Mizo hming a mawi

Nimin I League inkhelah Sreenidi Deccan chuan 4-1 in Inter Kashi an sawp a, Lalnuntluanga Bawitlung leh R. Lalbiakliana ten Hyderabad club tan goal an khung ve ve - Rosenberg Gabriel leh Pawan Kumar ten goal khat ve ve an khung bawk a, Inter Kashi tan hun pek belha Mario Barco goal khungin awmzia a nei phak lo.

Sreenidi hian match hnih an khelh aṭangin vawi hnih hnehna an chang ta a, hetihlai hian Kashi erawh match hnih an khelh tawhah chak an la nei lo - Sreenidi tan Lalromawia chuan inkhel bul ṭanin, Lalnuntluanga leh Biaktea te chu bench aṭangin a lut a, Inter Kashi lamah Edmund Lalrindika chuan inkhel bul a ṭan.

Nizan khan Mohammedan SC leh Shillong Lajong inkhelin, result kan hre hman lo a, vawiin tlai dar 3:00 hian Real Kashmir chuan Manipur club Trau an mikhual ang. Pathianni zan dar 7:00-ah inkhel pakhat a awm dawn bawk a, Gokulam Kerala chuan Neroca an mikhual dawn a ni.