Santosh Trophy champion Services

Santosh Trophy-ah Services bawk an champion. Nimina Santosh Trophy vawi 70-na final Nagpur-a khelhah Services-in Arjun Tudu-a goal hnih hmangin Maharashtra 2-1 in an hneh a, kum nga chhunga a vawi li nan an champion. Services champion kara nomawi chawi thei chu Mizoram chiah an ni.

Inkhel chanchin

Pathianni tlaia final khelhah Mohammed Shabaz Pathan hmangin inelna thlengtu Maharashtra-in minute 15-naah hma an hruai a, goal khungtu hi Mizoram 1-0 a an hneh
ṭuma freekick hmanga chakna goal khungtu kha a ni. Minute 10 hnuah Services midfielder Francis Zonuntluanga siam chu Arjun Tudu-a'n goal-ah chantirin 1-1 a ni.

First half tawp hmain Maharashtra tlarhnung tihsual hmang ṭangkaiin Arjun Tudu-a'n goal hnihna a khung a, hun tawp thlengin Services an ṭang tluan bawk.

Maharashtra hi inelna thlengtu an ni a, mipui lam aṭangin ṭawiawmna an ṭha a, chu ti chung chuan Mizo midfielder pahnih Francis leh Kolasib tlangval Achhuana te khelhna hi an talbuai lo. Second half-ah pawh Services hian chance an nei ṭha zawk a, Maharashtra keeper Owais Khan khel ṭha lo se chuan goal tam zawk an khung ang.

Maharashtra kalkawng

Maharashtra keeper Owais hian final-ah a team-te chhanhim zo lo mah se semifinal an thlen theihna kawngah erawh player pawimawh an ni.

Mizoram an khelh ṭumin first half tawp hmain goal ngei tur chu Owais hian box pawnah a kutin a beng thla a, red card hmu mah se 1-0 in Maharashtra an chak a, semifinal ticket an nei a, he result hi Mizoram tan a pawi thui ta chiah a ni.

Services an tluang

India rama sipai hrang hranga footballer ṭha awm khawmna Services hi tun hnaiah Santosh Trophy-ah an che ṭha tluang hle.

Kum 2012 leh 2013 khan an champion zawn a, kum 2014-ah Mizoram nen group khatah awmin Mizoram an hneh lo a, group stage an paltlang lo.

Kum 2015-ah erawh an insiam ṭha a, final-ah a thlengtu Punjab 1-0 in an hneh a, an champion - kum 2015-ah hian Mizoram hi Punjab-in semi final-ah penalty-ah an hneh a ni.

Kum 2016 a ni a, Services an che ṭha chho zel a, an champion leh ta a; nimahsela group stage-ah hneh loh pakhat an nei a, chu chu Mizoram an ni. Mizoram hian semi final beiseina an neih tawh loh hnuah an group match hnuhnung berah Services hi 2-1 in an hneh.

Mizoram leh Mizo players

Kumin Santosh Trophy-ah hian Mizoramin semifinal thleng zo lo mah se, semi final result leh final result en hian an result a zahpuiawm loh. Mizoram hian group stage-ah Maharashtra hi vanduai takin 1-0 in an hneh lo a, champion zui ta Services hi 2-1 in an hneh.

Champion team Services hian group stage-ah injury time-a Francis Zoununtluanga goal hmangin Maharashtra hi 1-0 in an hneh a, Mizo tlangval goal vangin Mizoram an tla.

Semifinal-ah Services hian extra time-ah Mohammed Ali goal hmangin Goa chu 1-0 in an hneh hram a, final-ah Maharashtra hneh nawnin champion nomawi an chawi a - Durtlang Leitan midfielder Francis Zonuntluanga chu Services champion-na kawnga player pawimawh a ni.