MCL hmahruaitu Chanmarians leh Chaltlang

Mizorama cricket inelna sum tamna ber Mapuia Cricket League (MCL) chu March 10 khan Suaka Cricket Ground, Sihhmui-a khelh ṭan niin Chanmarians CC leh Chaltlang CC te match hnih khelh tawhah hnehna la chang ve vein league hmahruaitu an ni.

Vawiin hian inelna hi neih chhunzawm a ni dawn a, match zawng zawng hi LPS1-ah Live-a pek chhuah vek an ni.

Round 1 thlirletna

Opening match-ah season hmasa MCL finalist Chanmarians-in 1st division champion Kulikawn CC chu wicket ngain an hneh. Kulikawn hian over 19.5-ah run 85 chauh siamin an thi fai vek a, Chanmari hian over 16.1 chhungin wicket nga hlohin an umpha.

Match hnihnaah Zarkawt Lords CC leh Armed Veng CC-te inhma-chhawnin bat hmasa Lords-in over 20-ah run 147 siamin wicket thum an hloh. An target run an umna kawngah Armed Veng hian over 20 chhungin run 137 chiah an tlin thei a, Lords hi run 10-in an chak a, ball 60-a run 95 lai vaw chhuaktu Zahir Uddin chu team chakna a ni.

Match thumnaah bat hmasa Chhinga Veng-in over 20 chhungin run 100 an tlin a, Chaltlang-in over 20-naah wicket ruk hlohin an umpha hram a, wicket li-in an chak.

Round 2 thlirletna

Match hmasa lama chak ve ve Chanmarians leh Lords an inkhel a, Chanmarians-in bat hmasain over 20 chhungin run 161 lawih an vaw chhuak. Hei hi Lords chuan khum tumin um mah se over 15.4-ah run 45 chauh siamin an out fai vek a, run 116 zetin Chanmarians an chak.

Kulikawn leh Chaltlang-te match hnihnaah inkhelin Kulikawn an bat hmasa. Kulikawn hian over 20 chhungin run 112 an tlin thei a, mahse champion tum Chaltlang-in over 18.2-ah wicket li hlohin target an umpha a, wicket ruk-in an chak.

Round 2 match thumnaah chak la nei lo pahnih an inkhel a, Chhinga Veng-in run 41-in Armed Veng an hneh. Chhinga Veng tan hian Alam Faruk-a'n run 52 zet a vaw chhuak.