Barca-in goal ruk an khung

Lionel Messi-a'n goal khat a khung a, a ṭhainte goal khung tur vawi thum siamsakin penalty a chhuih lut lo thung. Inrinni zan khan Barcelona chuan an mikhual Getafe chu 6-0 in an sawp.

Barcelona-in a zawna league match vawi 12 an chak zawnna zanah hian Getafe midfielder Juan Rodriguez chuan minute kuana lekah anmahni lamah a tilut palh a, Munir El Haddadi leh Neymar-te chuan Messi cross aṭangin an khung chhunzawm a, Argentina captain hian chawlhlawk hmain an goal lina a khung bawk.

Second half ṭan tirhah Neymar chuan Messi hnen aṭanga a ball hmuh chu a khung leh a, Arda Turan chuan an goal rukna a khung zui bawk.

Barca hian league match 29 khelh tawh aṭangin point 75 hmuin hmahruaitu an la nih chhunzawm zel a, inkhel dangah Atletico Madrid chuan Deportivo La Coruna lakah 3-0 hnehna an lo chan ve avangin an inthlauhna hi point riat a la ni chhunzawm zel.

Barcelona coach Luis Enrique chuan, "Hetiang dinhmun duhawm kan tawng chho thei zel hi a lawmawm a, player ṭhenkhat chawlh tir chunga goal ruk kan khung thei a nih chuan kan khel ṭha tlang hle tihna a ni, kan result hi a lungawi thlak hle a ni," tiin a sawi.

Atletico chak zel

Antoine Griezmann chuan tun season-a inelna hrang hrangah a club tan goal 23 a khung tling ta a, Atletico Madrid chu Deportivo La Coruna lakah 3-0 in hnehna a chanpui.

Diego Simeone a naute hian Saul Niguez, Griezmann leh Angel Correa-te goal hmangin hnehna an chang a;t un season-ah inelna hrang hrangah match 27 chu clean sheet an nei tawh.

La Liga a pahnihna ni mek Atletico hian Thawhlehni zan hian Cham-pions League last 16 second leg-ah PSV Eindhoven an mikhua ang.