Super 10 khel turin Afghanistan an tling

T20 World Cup khelh mekah Afghanistan-in cricket khawvel an barakhaih a, Inrinni khan rin kai zawk Zimbabwe chu run 59-a hnehin Super 10-an inhlangkai.

Afghanistan hian over 20-ah run 186 an vaw chhuak a, mi paruk an hloh. Afghan batsman zingah run 40 siamtu Mohammad Shahzad, run 43 siamtu Samiullah Shenwari leh run 52 siamtu Mohammad Nabi-te an che ṭha hle.

Zimbabwe-in theih-tawp chhuahin an target um mah se Afghan bowler-te an ngam lo a, over 19.4-ah run 127 siamin an vaiin an out vek. Zimbabwe tana run siam hnem ber Tinashe Panyangara chuan run 17 a tlin thei hram a ni. Afghan bowler zingah Rashid Khan chuan over li a vawmah run 11 chiah pein wicket thum a la a ni.

Group B inkhel dang-ah Scotland-in wicket riatin Hong Kong hneh mah se Afghanistan an umphak theih tawh loh avangin an result in awmzia a nei lo. Group B-ah hian Afghanistan, Zimbabwe, Scotland leh Hong Kong-te awmin an inkhel chhuak vek tawh a, Afghanistan hian hnehna chang fai vekin Super 10-ah an inhlangkai ta a ni.

Group A lamah Ire-land leh Netherlands-te'n beisei tur an neih tawh loh avangin nizana Bangladeh leh Oman inkhela chak zawk zawkin Super 10 an lut dawn a, he chanchin buatsaih a nih lai hian result erawh kan hre hman lo.