FA Cup atangin Chelsea an tla

Romelu Lukaku goal hnih khung hmangin Inrinni zan khan Everton chuan 2-0 in Chelsea an hneh a, Blues hi FA Cup quarterfinal aṭanga pet chhuah an ni. Inkhel dangah Crystal Palace chuan Reading hnehin semifinal an lut bawk.

Chelsea striker Diego Costa leh Gareth Barry-te chu hun tawp dawnah hnawhchhuah an ni a, team pahnihin player 10 ve vein an khel tluan.

Lukaku show

Goodison Park-a inkhelah Lukaku chuan minute 77-naah solo goal ropui a khung a, Belgium international hian minute 82-naah a goal hnihna khung zuiin Toffees chu kum 2011-12 hnua a vawi khat nan FA Cup semifinal a hruai thleng.

Kum 22-a upa Lukaku hian Anderlecht aṭangin kum 2011 khan Chelsea a zawm a, mahse Blues tan khelhna hmun a chang tam lo a; West Brom leh Everton-ah loan-in a chhuak zui. Kum 2014 khan Toffees-ah hian a ngheta lutin tun season-ah a club tan inelna hrang hrangah goal 25 a khung tling der tawh.

Buaina ral lian Costa?

Chelsea hian Champions league-ah Paris St-Germain an hneh loh hnu chiahah Everton an hneh lo zui a, Roman Abramo-vich-a'n thuneihna a chan hnua a vawi khat nan season thar hian Europe-a inelna lianah an tel theih a beiseiawm tawh loh.

Everton nen an inhma-chhawn
ṭum hian Spanish stri-ker Costa chu Barry-a'n a tihtluk vanga a insum zo loin a thinurna a lantir chiam avangin minute 84-naah hnawhchhuah a ni a, England interna-tional Barry pawh hi a hnu minute li lekah Cesc Fabregas laka a foul vangin hnawhchhuah a ni zui ve bawk.

Spain international Costa hian kum 2014 nipui laia Blues a zawm aṭanga hnawhchhuah a nih vawi khatna a ni. Mahse kum 27-a upa striker nungchang mawi lo tak hi kum 2015 January thlaa Liverpool nen League Cup semifinal an khelh ṭumin Emre Can laka a chet mawi loh vangin match thum chhung khel thei lo tur a hrem a lo ni tawh a, he mi kum vek September thlaa Arsenal nen league match an khelh
ṭuma Gunners defender Laurent Koscielny laka a nungchang mawi lo vangin match thum chhung bawk hrem a lo ni tawh bawk.

Eng nge an sawi?

Everton boss Roberto Martinez chuan, "Diego Costa leh Gareth Barry-te tlu lai kha ka hmu a, Coata khan a seh chiah em tih erawh ka hmu fiah thei lo thung. Red card pahnih kha referee thutlukna dik tak niin ka hria, kan fan-te khan hnehna kan chan theih nan min pui ṭha em em a, boruak ṭha tak hnuaia inkhel en an phu," tiin a sawi.

Chelsea boss lailawk Guus Hiddink chuan, "Ka awmna aṭang khan chiang taka ka hmuh theih loh avangin Costa khan Barry a seh ngei em tih ka chiang lo. Engpawh nise khelmual chhunga awm dan tur a nih loh avangin chawlh a mamawh," a ti.

Kum 21 hnuah Palace

Crystal Palace chuan kum 21 hnua a vawi khat nan FA Cup semifinal an lut ve leh ta a, Yohan Cabaye leh Fraizer Campbell-te goal khung hmangin Championship club Reading chu 2-0 in an hneh.

Palace hian kum 2016 bikah league match-ah hnehna an la chang miah lo a, FA Cup-ah Stoke, Southampton leh Tottenham lo pet chhuak tawh mah se league table-ah 15-naah an tla thla tawh a ni.

Crystal Palace manager Alan Pardew chuan, "Replay khelh a ngai dawn ngeiin a lang hman a, kan goal kha minute 86 leh 90+4 a lut a nih avang khan kan inhnehtawk turah ka lo ngai hman. Hnehna kan chan hian league lamah rah ṭha a chhuah theih ka beisei," tiin a sawi.