Khatla TBL leh Tuikual South an chak lo

14th March, 2016

Mizoram Super League season 2-ah ṭha fal an awm lo tihnemngheh nan Zirtawpni inkhelah Khatla TBL leh Tuikual South an chak lo. Mission Veng Vikings-in Tuikual South hnung zuiin semifinal an lut a, hmunruak pahnih la awm hi TBL, Zarkawt club pahnih Serpents leh BCA ten an inchuh ang.

TBL chak lo

MSL1-ah Khatla TBL hian Vikings hi vawi hnih an hneh a, MSL2-a an intawn vawi khatnaah erawh 71-86 in an hneh lo thung. TBL hian quarter hmasa berah 21-21 in Vikings hi chei tawk viau mah se quarter dang pathumah Mission Veng an chungnung zawk vek.

Vikings tan Lalrina Renthlei leh Dishant V Shah an khel ṭha fal a, Tuikhuahtlang tlangval Lalrina hian point 22 a score a, Gujarat center Dishant-a'n point 20 zet a nei bawk. MSL1 MVP Laldinsanga leh a hoten Vikings an ngam lo a, champion tur chuan state pawn player puihna an mamawh niin a lang.

Serpents chak chiang

Semifinal lut chiang tawh Tuikual South chuan a vawi khat nan MSL2-ah an chak lo a, Zarkawt Serpents lakah 66-59 in an tlawm.

Serpents-in inkhel bul an ṭan fuh a, quarter hmasa berah Jonathan Vanlalhriatpuia, Lalsangkima, Hming-thanmawia leh Robert Lalfak-zuala te hmangin 24-8 zetin hma an hruai fal nghal. Awlsam taka chak thei tur dinhmunah ding mah se hun tawp lamah Tuikual South an rawn che ṭha a, Serpents an him hram.

Kar pawimawh

Tunkar hian league stage a tawp dawn. Thawhlehni zanah MSL1 leh Marova Memorial Basketball final rematch kan hmu dawn a, Zarkawt BCA leh Khatla TBL inkhel tur a pawimawh.

MSL-ah hian goal average aiin head to head dah pawimawh a ni a, point inang pahnih aia tam an awm a nih chuan point intlukte bik intum kualna goal average en tur a ni. Table thlirin team tin an intluk tawk a, Zirtawpni inkhel tur Zarkawt Derby bakah Tuikual South leh Khatla TBL inkhel tur hi a ngaihnawm ang.

MSL2 khelh hmabak

March 15, Thawhlehni Zan

8:00 PM Khatla TBL Vs Zarkawt BCA

March 17, Ningani Zan

8:00 PM Chaltlang Ryders Vs MSV Vikings

March 18, Zirtawpni Zan

2:00 PM Zarkawt BCA Vs Zarkawt Serpents

8:00 PM Tuikual South Vs Khatla TBL