Mizo coach hnuaiah Corps of Signals champion

Goa First Division League neih zawh takah Lalliantluanga Pachuau enkawl Corps of Signals an champion a, season tharah Goa Professional League an khel ang.

Corps of Signals hian champion turin match 14 khelhah vawi riat an chak a, vawi nga draw result neiin vawi khat chiah an chak lo. Goan first division league champion team-ah hian Mizoram aṭangin player pali PC Lalruatfela (Kanan), TC Lalhuapzaua (Hnahlan), Lalramsanga Hauhnar (Zemabawk North) leh Vishnu Chettri (Falkland) an tel a, an vaiin player pawimawh vek an ni.

Corps of Signals coach Lian-tluanga chuan, "Kan club hi a hna ngheta luh theih a ni a, Mizo player palite hian hna nghet an nei vek. Matric pass leh National level-a khel tawh tan chuan trial theih a ni. Mizo player-te a tam thei ang berin hna nghet nei se ka duh a, kum thum vel hun ka la neih chhung hian Mizo duhsak ka duh a ni," tiin Vanglaini palai a hrilh.

Champhai Zote tlangval Lian-tluanga hian kum 1994 khan player angin Corps of Signals a zawm a, 2011 khan football khelh a chawlhsanin coaching lam a luhchilh a. NIS coaching certificate a neih hnuin Liantluanga hian 2012-13 season aṭangin Corps of Signals a enkawl a, kum li hnuah Goa Professional League a thlenpui.

2015-16 Goa Profes-sional League hi khelh zawh a ni tawh a, team 10 awmin Sporting Goa an champion a, goal 11 khungtu Odafe Onyeka Okolie chu top scorer a ni.