Norwich-in City an chelh

Manchester City-in Carrow Road-ah goal an khung thei lo a, Norwich City nen an inhnehtawk avangin match kua khelh tur la awmah City-in point kua zetin hmahruaitu Leicester City an pha tawh lo.

Premier League season tawpah tlak hlau club-in champion tum an barakhaih fo a, Norwich-in a kaw tawp aṭangin City tlarhma an tibeidawng. Canaries keeper John Ruddy-a'n Argentine striker Sergio Aguero goal khung tur vawi hnih a dang a, Norwich tlarhnungten City player-te an chelh hneh hle.

Mualneitu tan Patrick Bamford chuan yard 25 aṭangin crossbar a pet per a, Graham Dorrans-a'n hun tawp dawnah chakna goal a khung teuh hle. Point hnih hloh City an vanduai tih ngawt thei a ni lo a, point thum an hloh loh avangin an vanneihah a ngaih theih hial.

City striker Wilfried Bony tlarhmaah a hlawh-chham a, midfield laiah Yaya Toure leh Kevin De Bruyne te awm lo an tuar tih phat rual a ni lo.

Manchester City manager Manuel Pelle-grini chuan, "Ball awm leh awm loh lai pawhin goal khung tumin theihtawp kan chhuah a, hun awl kan insiam thei lo. Champion turin kan dinhmun a
ṭha lo a, amaherawhchu chhiarkawp dana kan la champion theih chhung chuan theihtawp kan chhuah ang," tiin a sawi.

Inkhel dangah Southampton-in Graziano Pelle goal hnih hmangin Europa League khel tura an elpui Stoke City an hneh a, relegation battle-ah Bournemouth-in Swansea City 3-2 in an hneh. Premier League kaithar Cherries-in match thum chhung a zawna an chak zarah point 38 an hmu tawh a, season tharah Premier League an khel leh ngei dawn niin a lang. Swansea erawh point 33 an hmu a, tla thei dinhmuna awm Norwich-in point riatin an pha lo.