Football mawina photu RB Leipzig hmaah Atletico an thamral

May 19, 2009 a ni a, chu chu kum 11 liam ta kha a ni. German fifth division club SSV Markranstadt chu Red Bull company-in an lei a, an hmingah RB Leipzig an vuah. 

Kum 2009-ah kha chuan Atletico Madrid tana Diego Forlan leh Sergio Aguero inkawp chu European football titi ngaihnawm an tling tawh a, Spanish club ṭha hian Leipzig hming an la hre ngai lo. 

Mahse, khawvel a ni miau a, beiseina neih a thiang - chu beiseina chu Leipzig-in mawi takin an vul pui a, Champions League final lut turin Atletico Madrid chu Ningani zan khan 2-1 in an hneh!

German club tan Dani Olmo leh Tyler Adams-ten goal khat ve ve an khung a, Atletico Madrid tana Joao Felix-a penalty chhuih luhin awmzia a nei lo - semifinal-ah French club ṭha Paris Saint-Germain-in an lo hmuak ang.  

Werner tel lohna 

Leipzig hian an striker chhuanvawr Timo Werner chu Chelsea hnenah pound maktaduai 54-in an hralh a, tun season-a goal 34 khungsaktu tel lo hian German club hi talbuai tura ngaih an ni. Kum 33 mi Julian Nagelsmann-a'n Werner nei lo mah se attacking football ṭhulh phah nan hman a tum lo a, 3-3-3-1 formation hmangin Atletico an nawr a, Werner tel lo erawhin a hmawr an bawk hleithei lo. 

Atletico-in coach Diego Simeone-a duh danin tawlh hnun an hnial lo a, Argentine boss hian Felix leh Alvaro Morata a nei chungin 4-4-2 formation-ah striker rorum Diego Costa leh midfielder Marcos Llorente inkawptir a thlang. 

First half-ah goal a lut lo a, second half ṭan aṭanga minute nganaah a nawrtu zawk team-in an khung ta nge nge - Leipzig midfielder ṭha mi Marcel Sabitzer-a cross aṭanga ball kal chu Olmo chuan a tauh lut a, Atletico keeper Jan Oblak tan tih theih a awm lo. 

Atletico-in goal venhim an thlang chungin goal an chhuah a,an innghahna counter attacking football hmangin Leipzig an nawr hleithei lo bawk. Simeone-a'n a tih tur a hria - Hector Herrera a la chhuak a, Felix luhtir a ni. 

Lisbon khaw tlangval Joao Felix-a'n an khuaah rei tak cham a tum tih pholangin football hmuhnawm a rawn pho chhuak a, Atletico inkhel a nung sawt a, Leipzig defender tan manganna vawi tam 

a thlen. 

Minute 71-na a ni a, Felix hian penalty a hlawh chhuak ta nge nge - a pet turin amah bawk a lo pen chhuak a, Portuguese rawlthar duhawmin goal-a chantir turin harsatna a nei lo. 

Hun tawp hnaih lam a ni a, 1-1 a nih bawk avangin tawnhriat nei ṭha zawk Atletico hi tlang tura ngaih an ni. Simeone pawhin hei hi hrechiangin extra time khelh chu an tan a fuh zawkah a ngai.

Atletico attacking game-a nung dawn chauh a, goal nawr aia fimkhur thlang ṭhintu Simeone-a'n Felix hoa an game a mawi chhoh lai takin a naute chu tawlh hnung turin a hrilh a, nawr zui ṭul a ti lo. 

Tun hnai kum ruk chhunga Champions League final vawi thum khel tawh Atletico coach Simeone hian skills aiah tawnhriat chhawr a tum a, extra time an hruai thlen chuan him zawkin chakna chance an nei turah a ngai. 

ṭha ber pawl meuh pawhin rel sual hun a nei a, a pawi zo ta. Midfielder ṭha Sabitzer bawk kan hmu a, a ke aṭanga chhuak ball ṭha tak chu Angelino chuan tlanpuiin Tyler Adams tan a siamsak. 

Kum 21 mi American midfielder hian goal-ah a 'shot' a, Atletico defender Stefan Savic perin Oblak rin loh lamah a lut. Tyler-a'n goal a khungin hun tawp nan minute hnih chauh a awm tawh a, referee-in minute nga dang pek belh mah se Atletico an tho tawh lo. 

Leipzig inkhel en chuan tlarhnunga Dayot Upamecano ṭangkaizia an hmuh hmaihin a rinawm loh a, Bundesliga en ṭhin zingah chuan kum 21 mi defender hi a mikhual tawh lo - khawvela centre-back ṭha ber pawl ni turin theihna a nei. 

French defender hi Atletico lakah pawh tlarhnung laiah dingin Leipzig game siamtu ber a ni a, amah aṭanga ball chhuak hmangin German club-in an game an din a, tlarhnung laia ding siin midfield thlengin duhthalin ball a dribble ngam a, a ball pass 91.5% zet a dik thei!

France Under 21 tana vawi 14 inlan tawh defender hi an ram senior team tan erawh a la inlan lo a, Atletico laka a inkhel kha Les Bleus (France sawina) coach Didier Deschamps-a'n a lo en a nih phawt chuan a ngaihtuahna a sen ṭhat a ṭul ang. 

Squad pumpuiin fak an phu rualin midfielder Marcel Sabitzer hming pawh lakchhuah bik zinga telh loh a harsa. Leipzig goal hnih thawk chhuaktu midfielder hian tun season-ah goal 16 khungin assist vawi 10 a nei tawh a, kum 26 mi chauh a la ni bawk.