Aw Julian, i ropui e!

RB Leipzig boss Julian Nagelsmann-a'n July 23 khan kum 33 a tling ve chauh a, Champions League semifinal khel tura team hruai thleng thei coach naupang ber a ni. 

Semifinal-ah PSG-a hmachhawn dawn a, French club enkawltu Thomas Tuchel-a'n Augsburg reserve team a enkawl lai khan assistant coach niin a coaching career a ṭan.Kum 20 mi lek nichunga a hliam na tak avangin a inkhelh chhunzawm thei lo a, coaching lamah a kal - kum 28 mi lek niin Hoffenheim coach atan ruat a ni a, a season hmasa berah palina a nihpui.

Hoffenheim-a a season hnihnaah Champions League khel turin a hruai thleng a, tun season ṭan dawn khan Leipzig hi a pan - league-ah pathumna an ni a, Champions League semifinal an lut! Nagelsmann hi Atletico nena an inkhelh chawlh lailawkah khan Simeone nen an inbakkaih deuh a, mahse coach naupang tak hian engkim a ṭhat leh tawh thu a sawi. 

German coach chuan, "Han inbakkaih zeuh kha chu kan nei ngei a, mahse a pawi thui lo. Hnehna chan reng duh mi a ni a, dressing room pannaah pawh chu chuan a rilru a luah a ni mai. "A miziaah buaina ka nei lo a, coach a nihna anga a nunphung hi ka ngaisangin ka zah em em zawk a ni. Inkhelh zawhah khan min lawmpui thu a sawi a, hnehna chan kan phu thu min hrilh a ni," a ti.