Sawisel theih takin Arsenal an chak lo

Premier League champion tum Arsenal chu Newcastle United lakah 1-0 in an tlawm. Magpies tan Anthony Gordon chuan goal a khung, goal awmchhun hian inkhelh lai leh a zawh hnuah sawizui a hlawh hle.

Champion lai Manchester City erawh an chak nuamsa. Striker ṭha bik Erling Haaland-a'n goal khung lo mah se, an mikhual AFC Bournemouth chu 6-1 a sawpin table chung berah an awm - zaninah Tottenham leh Chelsea an inkhel dawn, result a zirin an dinhmun a la danglam thei.

Chak lo Arsenal

Mikel Arteta-a'n team nghet tak a din tawh a, mahse an duh tak EPL nomawi an la chawi lo, kuminah chawi ngei tumin an league match hmasa 10-ah an tlawm miah lo, tunah erawh ngam loh an tawng ta.

Ruah a sur deuh avangin St. James' Park a nal a, mualneitu lamin tharum an hman nasat avangin Arsenal an che hleithei lo. Inkhel boruak a sang, hlauhawm takin Kai Havertz-a'n Sean Longstaff a titlu a, hnawhchhuah a ni lo chu a vannei.

Bruno Guimaraes pawhin Jorginho a nghawk a, referee Stuart Attwell-a'n red card a pe lo chu a vannei ve bawk. Team pahnihin midfield thununtu zawk nih an tum nasa - Declan Rice nghet viau lo se la chuan Gunners an talbuaiin a rinawm.

Minute 64-na a ni a, a sir aṭangin Joe Willock chuan a cross lut a, Arsenal keeper David Raya chuan lo khawih phak loin ball kang inchuhnaah Joelinton chuan Gabriel nam thluin ball a tauh phei a, goal line bula awm Gordon chuan chiang zetin a lo khung.

VAR hmangin thil thleng hi ennawn a ni a, ball-in line a pel hman em? Joelinton kha a foul em? Gordon a offside em? tihte chu zawhna a ni a, minute li chhung an ennawn hnuah goal atan pawm a ni - Magpies an lawm laiin Gunners an thinur thung.

Ngaihna hre lo

Arsenal manager Mikel Arteta chuan video assistant referee (VAR) hmanga thil pathum an endik hnuah pawh, thil dik lo hmu loa goal atan an pawm mai chu a ngaihna a hre loin, mualpho thlak hle nia a hriat thu a sawi.

Arteta chuan, "Goal atana pawm theih loh hulhual a ni. Thutlukna dik lo tak avangin kan chak lo. Premier Legue hi khawvela league ṭha ber tiin kan sawi ṭhin, kum 20 chhung ka lo chamchilh tawh, tunah erawh ka zak hle a ni," a ti a, a lungawi lo hle.

Newcastle manager Eddie Howe chuan, "Goal ṭha tak niin ka hria. Khelmual sirah awmin VAR hmangin kan lo en ve a, mahse thlalak pangngai chu a awm lo. Eng thil thlengah pawh ni se VAR hman a nih chuan a tawpah pakhat zawk chuan kan tuar ṭhin," tiin a sawi.

A goal luh dan chu engpawh lo ni se, coach Howe enkawl Newcastle United lamin point thum an hmu. Premier League table-ah parukna dinhmun an luah leh ta a, season hmasa ang bawkin club lian dang an elphak leh dawn.

City chak chiang

Pep Guardiola enkawl team Manchester City an danglam leh ṭhin. Bernardo Silva-a'n goal hnih a khung bakah Jeremy Doku, Manuel Akanji, Phil Foden leh Nathan Ake ten goal khat ṭheuh an khung, mikhual tana Luis Sinisterra goal khungin an mualpho a hliah phak lo.

Mi tam takin Haaland bawk langsar turah an ngai a, mahse inkhel entute chuan Doku chanchin an sawi zui nasa ber. Kum 21 mi Doku hian goal a khung bakah a ṭhiante khung tur vawi li ngawt a siamsak.

Citizens manager Guardiola chuan, "Inkhel entute tan hmuhnawm a chawpchhuahsak a ni. Ball a chan apiang mai khan miin hmuhnawm an ti em em a, kei ngei pawhin lungawi takin ka lo en," tiin Belgian rawlthar chungchang a sawi.

Pep-a naute hian EPL nomawi chuhpuitu an ngah a, an tan chetsual a rem lo. Kar tawpa Chelsea nen league match an khelh hmain Champions League lamah Young Boys an hmachhawn leh phawt dawn, hmabak a hautak dawn hle.

Tlawm lo awmchhun Spurs

Premier League season hman laiah Arsenal an tlawm ta a, tunah chuan Tottenham Hotspur chauh tlawm loa kaltluang awmchhun an ni ta. Ange Postecoglou naute hian zanin dar 1:30 hian Chelsea an mikhual dawn - London derby hi a hmuhnawm ang.

Manager thar Postecoglou-a'n beisei phak baka ṭhain a naute a kaihruai mek a, captain thar Son Heung-min leh James Maddison te chu team dang tana hmachhawn châkawm lo leh huphurhawm an ni mek; Blues tan pawh an hnawk leh ngeiin a rinawm.

Mauricio Pochettino enkawl Chelsea erawhin leirem an la rap fuh thei lo. League-ah chuan Brentford hneh lo hlim an ni - Spurs hnuah Manchester City, Newcastle United, Brighton leh Manchester United an tum zawn dawn - Poch tan fiahna hautak, a hmalam hun hril thei tur a inṭan mek.