Ten Hag-a'n Man United a la enkawl dawn

Manchester United-in Inrinni zan Premier League inkhelah injury time-a Bruno Fernandes-a goal hmangin Fulham 1-0 in an hneh a, Erik Ten Hag-a'n thawk lakna hun a neih phah ang.

Craven Cottage-a an lenluh hma hian Man United hian Man City leh Newcastle United te chu an mualah 3-0 ve vein an hneh lo. Dutch manager Ten Hag-a chu ban theih dinhmunah a ding.

Fulham lakah pawh Man United hi an talbuai leh a, Scott McTominay hmanga an goal khung chu VAR hmanga pawm a nih loh avangin an harsatna belhchhahin a awm. A tawpah captain Bruno Fernandes-a'n a theihna a rawn pholang a, box chhungah rilru fim tak pu chungin goal kilah mawi zetin chakna goal a khung.

Premier League-ah VAR-in sawizui a hlawh a, minute riatna leka McTominay-a goal khung an pawm loh chungah pawh United ṭantute an lawm lo. Chutihrualin chik taka thlir chuan McTominay goal khung hma hian Harry Maguire chu offside position-a a awm miau avangin VAR thutlukna a dik si - Man Untied an vanduai!

Man United striker Rasmus Hojlund-a'n goal a khung thei lo chhunzawm zel a, winger man to Antony pawhin a man phu khawpin a khel chhuak thei lo. Mikhual team tlarhma a bil a, Fulham-in goal chance an nei ṭha zawk.

Mahse, a tawpah captain Fernandes a rawn inlar a, chakna goal a khung. Man United captain hlui Roy Keane-a'n captain tlak loa a sawi Fernandes hian goal hmangin amah sawiseltute a rawn chhanglet.

Amaherawhchu Man United hian season bul an ṭan chhiat avangin match 11 aṭangin point 18 chauh an la hmu a, hmabak an la ngah hle. UCL-ah pawh Man United hi an talbuai a, knockout stage luh an duh a nih chuan November 8, Nilaini zanah Copenhagen an hneh ngei a ṭul ang.