South America champion Fluminense

Fluminense chuan Copa Libertadores-ah a vawi khat nan champion nomawi an chawi a, Boca Juniors chu 2-1 in an hneh - Fluminense tana champion nomawi chawi zingah Marcelo a tel a, Real Madrid defender hluiin kum 35-ah pawh nomawi a la chawi zel.

Copa Libertadores final hmuhnawmah Fluminense-in goal an khung hmasa a, veteran forward German Cano chuan theihna a la nei reng a ni tih pholangin, minute 36-naah hmahruaina goal a khung.

Mahse, Boca Juniors tan Luis Advincula chuan minute 72-naah mawi zetin si phurh a sut a, goal dang a luh loh avangin extra time khelh zui a ni.

Fluminense tan John Kennedy chuan minute 99-naah khung ve lehin, Brazilian club hma a hruai nawnpui a, mahse, minute hnih hnu lawkah Brazilian striker hi a yellow card pahnihna a hmuh avangin hnawhchhuah a ni.

Boca lakah player 10-in Fluminense an khel zui a, mahse, Nino kut a thlak avanga Frank Fabra hnawhchhuah a nih ve leh avangin Fluminense an ṭang tluan thei a, 2-1 a hnehna changin an champion.

Real Madrid tana Champions League nomawi panga chawitu Marcelo chuan, "Real Madrid-in an hrethiam ang. Fluminense hi min chhertu an nih avangin ka tan chuan ka career-a nomawi pawimawh ber a ni.

"Ka club ngainat em em tan nomawi pawimawh tak mai ka chawi a, he club hi ka career-a ka hlawhtlin theih nana ka mamawh zawng zawng min petu an ni a, an hnathawkte hian ka zinkawng zawng zawng min hriatpui - hei aia lawmna ropui zawk a awm chuang lo a, mana lei theih a ni lo," a ti.

Marcelo hi Champions League leh Copa Libertadores-a champion thei player 15 zingah a tel a, Ronaldinho, Neymar leh Julian Alvarez te pawhin nomawi langsar pahnih hi an lo chawi ve ve tawh.