Cricket World Cup New Zealand, Pakistan leh Afghanistan tan hmun ruak pakhat

Cricket World Cup-ah semifinal khel tur a chiang chho mai tura ngaih tawh hnuah kartawp inkhel result avangin boruak a rawn alh thar hle. Pakistan-in New Zealand an hneh avangin Black Caps dinhmun a chiang ta lo a, Afghanistan-in Netherlands an hneh avangin an kutah engkim a awm bawk.

India rama khelh mek cricket inelna lianah hian nimina inkhel inelna thlengtu Men in Blue leh an khingpui South Africa te semifinal lut turin an tling tawh. Australia pawhin champion lai England hnehin an dinhmun an sawhnghet chho viau. Amaherawhchu hmun ruak pakhat hi a la chiang lo a, tunkar chhoah chinfel a ni ang.

Theihna nei Afghan

Afghanistan-in November 3, Zirtawpni khan Ekana Sports City, Lucknow-ah Netherlands an hmachhawn. Netherlands hi ṭhumvawrah chakin vuak hmasak an thlang a, top order ho che ṭha mah se middle order leh tailender ho an che thei lo a, over 46.3-ah thi vekin 179 runs chauh an siam. Afghanistan bowler Mohammad Nabi chuan wicket thum lain 28 runs chauh an pe.

Afghanistan bat hun a thleng a, chak satliah an tum lo. NRR siam ṭhat nan chiang taka chak an tum a, an tumah an hlawhtling. Rahmat Shah (52) leh captain Hashmatullah Shahidi (56) ten half century an siam a, over 31.3 lekah 181/3 runs siamin hnehna an chang. Shahidi chuan inkhelh banah bowling leh batting bakah fielding thlenga an chet ṭhat thu a sawi.

Jonathan Trott kaihhruai Afghanistan hian Australia leh South Africa te an la hmachhawn dawn a, an chak ve ve theih chuan inkhel dang result nghah ngai loin semifinal an lut dawn. Mahse, Afghanistan tan Aussies leh Proteas hneh ve ve hi a awlsam lo tawp ang.

Bangalore-ah ruah leh run a sur

November 4, Inrinni khan M. Chinnaswamy Stadium, Bangalore-ah inkhel hmuhnawm bik chhawpchhuah a ni. Pakistan ṭhumvawrah an vannei a, khaw awm dan hre chungin captain Babar Azam-a'n vawm hmasak a thlang. A chhan chu DLS Method hman a nih chuan bat hnuhnun zawk hi a ṭha ṭhin.

Black Caps hian batting class an la a ni ber. Captain Kane Williamson a rawn kir a, run a siam a ni ringawt lo - a chet dan kha cricket khela ei zawn tum tan en hmaih a thiang lo. Williamson a vanduai a, century siam pha loin 95 runs a siam.

Rachin Ravindra-a'n inelna ṭha tak a hmang chhunzawm zel a, 108 runs a siam. Inkhelhna hmunin a zir a, Black Caps batter-te an che ṭha bawk nen over 50-ah 401/6 runs an siam.

Pakistan tana target 402 runs chu um phak theih loh tluk a ni a, Abdullah Shafique-a'n run li lek siam mah se Fakhar Zaman (126*) leh Babar Azam (66*) te inkawpin thil theih loh an thlir a ni ber a, ruahin a chhan bawk.

Over 21.3-ah Pakistan hian 160/1 runs an siam a, ruah a sur. Over 20 an vuak tlin tawh avangin ruahsur vangin inkhel thei lo pawh awm se DLS Method hmangin result a awm tawh dawn. Shaheens hi an vaw ṭha a, wicket khat chauh an hloh bawk avangin DLS hmangin chak tur zawk an ni.

Target ennawn a ni a, over 41-ah target chu 342 runs-ah an titlem. Mahse, hemi hnu chiah hian over li chauh an khel leh thei a, over 25.3-ah Pakistan hian 200/1 runs an siam. Ruahsur vangin an inkhel thei tawh lo a, DLS hmanga an en hnuah 21 runs-in Pakistan an chak.

A nghawng chu

Pakistan hian hnehna hlu tak an chan avangin semifinal beiseina an nei thar a, an match hnuhnung berah England an hmachhawn dawn. New Zealand pawhin tla tawh Sri Lanka an hmachhawn thung ang. Chutihrualin tun dinhmunah Black Caps hi an NRR a ṭhat avangin Shaheens chunga awm turin an dinhmun a ṭha hle.

Team pahnih hian Afghanistan inkhel result an ngaihchan a ṭul bawk. Afghanistan hi an inkhelh hmabak pahniha an chak ve ve chuan Pakistan leh New Zealand te hi an tla ang.