Dortmund leh Bayern danglamna Kane

Bayern Munich-in Harry Kane-a tel loin third division club Darmstadt an hneh lo a, England captain tel chuan Bundesliga-a an elpui Borussia Dortmund chu an mualah an sawp. Signal Iduna Park-ah Dayot Upamecano-a'n goal hmahruai a khung hnuah Kane-a'n hattrick a siam.

Bundesliga inkhel dangah hmahruaitu Bayer Leverkusen-in Hoffenheim chu 3-2 in an hneh a, Xabi Alonso hote hi match 10-ah 28 points hmuin hmahruaitu an ni mek.

Germany-ah Bayern elpui ber chu Borussia Dortmund an ni a, mahse a sa sehah Dortmund an duap leh ṭhin. Inrinni zanah Yellow Wall hoin beiseina sang tak nei mah se minute lina lekah Upamecano-a'n a tauh goal.

Bayern an phur zui a, minute kuanaah Leroy Sane pass chu Kane-a'n a khung. Dortmund-in first half tawp hma chiahin si phurh sut ṭhenna hun nei mah se Donyell Malen-a'n goal zawnah a pet lo. Second half-ah Bayern-in bul an ṭan ṭha a, Jamal Musiala-a'n keeper chauh a hmachhawn hnuah a ti goal lo. Kane erawhin a hun ṭha a bawhpelh ve lo a, minute 72-naah Kingsley Coman-a cross chu Kane-a'n a khung.

Injury time-ah Kane-a'n a ball ṭha hmuh chu khalh lutin hattrick siam nan a hmang. Tottenham forward hlui hian Bundesliga match 10 aṭangin goal 15 a khung der tawh. Bayern hian November 8, Nilaini zan dar 1:30 hian Galatasaray an mikhual dawn a, hnehna an chang a nih chuan match li lek aṭangin knockout stage an lut dawn.

Bayern manager Thomas Tuchel chuan, "Engvangin nge kan chak? Team chhungah buaina leh hmasawnna kan nei si lo! Lothar-a'n a hria ang," tiin amah sawiseltu Germany leh Bayern legend Lothar Matthaus a kap let. Tuchel chuan, "Kan team khelh danah ka lawm a, engkim kha a fuh. Kan khel ṭha em em a, chak kha kan phu," tiin a sawi.