Odisha a zawnin an chak

Indian Super League-ah Odisha chuan 1-0 in NorthEast United an hneh a, league match hnih a zawnin hnehna an chang ve ta - Odisha tan Diego Maurício chuan inkhela goal awmchhun a khung a, Highlander lam hian a chhangletna tur an nei lo.

Odisha tan Jerry Mawihmingthanga, Isak Vanlalruatfela leh K. Lalṭhathanga ten goal khungna remchang an nei vek a, mahse, an chance neih hi an chhawr thei lo vek - Odisha tan hian Jerry Lalrinzuala chuan inkhel bul a ṭan bawk.

Hetihlai hian Inrinni zan khan Hyderabad FC leh Bengaluru FC intawngin, 1-1 in an inhnehtawk bawk - Hyderabad tan Mohammad Yasir chuan goal hmahruai a khung a, Bengaluru tan Ryan Williams chuan si phurh sutin, chak zawk awm loin an ṭin. Hyderbad tan Mark Zothanpuia chuan inkhel bul a ṭan.

Match hnih a zawna an chak loh hnuah match hnih tho a zawnin Kerala Blasters an chak ve leh ta a, Inrinni zan khan East Bengal chu khualmualah 2-1 in an hneh.

Blasters tan Daisuke Sakai chuan goal hmahruai a khung a, minute 88-naah Dimitrios Diamantakos chuan a belhchhah bawk. Mahse, Greek striker hian a goal khung a lawm uchuak hret a, a yellow card pahnihna hmuin hnawhchhuah a ni.

A la tawp mai lo - hun pek belh minute kuanaah East Bengal-in penalty an hlawh chhuak a, Cleiton Silva chuan goal-ah a chantir. Mahse, Kolkata club tan point hlawh chhuak turin a tlai hret tawh a, mahni mualah an tlawm.

East Bengal tan Lalchungnunga'n inkhel bul ṭanin, Mizo inlan dang an awm lo.