Inter chak laiin Milan an tlawm

Serie A champion tum Inter Milan chuan Inrinni zan khan Atalanta 2-1 in an hneh a, point thum an hlawhchhuah laiin an elpui AC Milan erawh an mikhual Udinese mualah 1-0 in an tlawm thung.

Inter tan Hakan Calhanoglu-a'n penalty a khung bakah Lautaro Martinez-a'n a khung a, mualneitu lam tan Gianluca Scamacca chuan goal khat a khung ve bawk, hun tawp dawna Atalanta defender Rafael Toloi hnawhchhuah niin, result erawh a tidanglam tawh lo.

Simone Inzaghi-a enkawl Inter tan chanchin lawmawm lo pakhat a awm, defender Benjamin Pavard chu hliam vanga thlak a ngai. Inzaghi chuan, "Season hmasa pawh khan a ni a, tun hma pawhin a ni tawh ṭhin - Atalanta lenchilh hi chu a harsa ziah.

"Ka nauten an khel ṭha em em a, kawng engkimah an tih tur an hlenchhuak ṭha hle. Vanduai thlak takin Pavard a hliam, a khup hliam kha na a ti ve hle a, engtianga rei nge a chawlh a ngaih dawn tih erawh ka la sawi thei mai bik lo," a ti.

Inkhel dangah AC Milan lamin goal an khung thei lo a, second half-ah penalty an chawi thung si - Udinese lamin Roberto Pereyra hmangin penalty an khung a, anmahni goal an venhim bawk avangin San Siro-ah an chak.

Milan coach Stefano Pioli chuan, "Zep tur a awm lo, tun season kan inkhelh tawh chinah chuan kan khelh chhiat ber ṭum a ni ang. Kan khelh dan leh result hi kan ngaihtuah nawn a ngai a, a rang thei ang bera kan siamṭhat nghal a ngai.

"Inkhel entu zingah min au el an awm kha a mak ka ti hran lo, ṭhenkhat chuan kan chak laiin min thlawp ṭha a, ṭhenkhat erawh chuan kan chak loh leh hun hrehawm kan tawn lai pawhin min thlawp tlat ṭhin - chung mite chu Milan ṭantu dik tak an ni," a ti.

Inkhel Results

Bologna 1 - 0 Lazio

Salernitana 0 - 2 Napoli

Atalanta 1 - 2 Inter Milan

AC Milan 0 - 1 Udinese