Barcelona an chak hram

Inrinni zan khan La Liga inkhelah Barcelona chuan hnehna an chang hram a, an mikhualna ramah Real Sociedad chu hun pek belha Ronald Araujo goal hmangin 1-0 in an hneh.

Hetihlai hian Girona chuan 4-2 a Osasuna hnehin La Liga hmahruaitu an ni a, nizana inlan Real Madrid-in hnehna an chan chuan Girona nen hian an point hmuh zat a inang ang.

Barcelona-in hnehna an chan avangin table-ah pathumnaah an invawrh chho a, hmahruaitu Girona hi point li ngawtin an phak lo mek - Atletico Madrid chu Zirtawpni zan inkhelah an tlawm bawk a, Las Palmas chu rin loh takin 2-1 in an ngam lo.

Barca an chak

Real Sociedad khelmuala inkhelah mualneitu team lamin hnehna chan an phu zawk a, Takefusa Kubo leh Martin Zubimendi ten goal khungna remchang nei mah se Marc-Andre ter Stegen chuan ṭha zetin a dansak a, Barca an vannei.

Barca tan Gavi chuan chance nei ve bawk mah se, Sociedad keeper Álex Remiro chuan a dansak. Team pahnih hi 0-0 in an ṭin mai dawn niin a lang tawh a, mahse, hun pek belh minute hnihnaah Araujo a inlar.

Ilkay Gundogan-a ball thlawh luh chu kum 24 mi defender hian a tauh lut a, video assistant referee hmangin ennawn ni mah se a offside lo tih a lang a, hun tawp dawnah Barca an vannei.

Girona beiseina

Beisei phak baka season hmang ṭha Girona chuan an season hman duhawm tak chu tihpalh thil a ni lo tih an pholan chhunzawm a, league hmahruaitu ni turin khualmualah Osasuna chu 4-2 in an hneh.

Girona tana Iván Martín-a goal hmahruai khung chu Ante Budimir-a goal hnih hmangin Osasuna-in an chhanglet a, Girona an tawlhthlu ve tawh dawn niin a lang hman. Mahse, tun season-a league match khat chiah la tlawm team hian tlawm hlen an tum lo.

Artem Dovbyk, Viktor Tsygankov leh Aleix García ten Girona tan second half-ah goal khat ṭheuh an khung ve leh a, hun tawp thlenga goal dang lut tawh loin Girona hi 4-2 in an chak.

Atletico an tlawm

Las Palmas khelmualah hnehna chan duhin Atletico Madrid an lenglut a, point hawn nei miah loin khelmual an chhuahsan - Atletico-in Las Palmas an hmachhawn hmain league match sarih zet chu a zawnin hnehna an chang tawh.

Zirtawpni zanah pawh chak leh mai tura ngaih an ni. Mahse, first half-a goal a luh loh hnuin Kirian Rodríguez leh Benito Ramírez ten Las Palmas tan goal khat ve ve an khung a, 2-0 a ni!

Atletico tan striker 'form' Alvaro Morata chuan si phurh rawn sut ṭhen mah se, goal a khung hian minute 83-na a ni tawh a, Atletico Madrid tan tho leh turin hun a tam tawk tawh lo.