Real Madrid nena inbe lo Mbappe

Season thara Kylian Mabppe awm dan tur an inrinsiak leh mek tawh a, tun hma lama an sawizawm tawh Real Madrid hming a ring - mahse Spanish club lian chuan France captain nen hian an inbiak loh thu a sawi.

Mbappe hian PSG tan tun season tawp thleng daih bak contract a nei tawh lo, nipui bazar lai khan Saudi Arabian club Al-Hilal chuan pound maktaduai 259 tehmeuhin lei chhuah an lo tum tawh a, hlawh tam uchuak tak pek an tum bawk, mahse a hnawl.

La Liga club Real Madrid chuan thuchhuah siamin, "Tun hnaiah kan club leh Kylian Mbappe te chu media hrang hrangin min sawizawm a, hemi chungchangah hian Real Madrid chuan PSG player ni lai nen hian inbiakna kan nei lo tih kan sawi chiang a, thuleng vak hi a dik lo," an ti.

Mbappe hi club lian hrang hrangin lakluh an duh a, chung zingah chuan Chelsea, Manchester United, Tottenham Hotspur, Inter Milan leh Barcelona te chu hming langsar an ni.

Kum 24 mi Mabppe awmna PSG hian Inrinni zan khan Ligue 1 match-ah Montpellier chu 3-0 in an hneh a, league match 11 aṭanga point 24 hmuin table chung berah an awm, pahnihna Nice chuan match khata khel tlem chungin point hnihin an inthlau.