Pep-a tan fiahna langsar a inchhawp

Zanin dar 12:30-ah Champions League quarterfinal khel turin Manchester City an inlan dawn a, French club Lyon an hmachhawn ang - City boss Pep Guardiola tan fiahna a ni dawn.

City-in Pep an lakluh chhan lian tak chu Champions League nomawi a ni a, English football bikah chuan Pep an lakluh hma pawhin an hlawhtling tawh. City neitu Abu Dhabi United Group-in European champion nih an châk avangin sum tam tak nen Pep an thlem lut. 

Spanish coach hian Barcelona-a chhuahsan hnuah hlawhtlinna tam tak a chhar chungin Champions League nomawi erawh a la chawi miah lo a, kuminah hun ṭha pek a ni leh ta - bawhpelh a thiang tawh lo. 

City leh Lyon squad en ila, player man zat leh hlawh zat aṭanga chhut ringawt pawhin khaikhin rual an ni lo. Hei ringawt en chuan City hi chak chiang saa dah ngam an ni a, Lyon zawk hian an pet chhuak a nih chuan 'thilmak' huang chhunga dah tur a ni ang. 

Hei vang tak hian Pep Guardiola tan zanin inkhel tur hi chona 'hautak' ni loin fiahna 'langsar' tia sawi theih a ni a, Barcelona boss hlui hian Lyon lakah hnehna a chang zo lo a nih chuan a tan mualphona tur a ni. 

Hriat tel tur erawh he team hi Cristiano Ronaldo telna Juventus pet chhuaktu team an ni a, Serie A champion coach Maurizio Sarri chuan a hna a chan phah bawk - a awlsam dawn lo. 

Pep-a'n City tana Champions League nomawi a chawi loh chuan Etihad Stadium-a a hun hman chu 'hlawhchham' tia sawi theih a nih thu fiamthuin a lo sawi tawh a, City-ah hian season thar atan bak contract a nei tawh lo. 

Spanish manager hian fiamthu vekin season hmasa khan Liverpool boss Jurgen Klopp chu a Champions League nomawi leh Premier League nomawi kawl lai inthlengpuiah a lo sawm tawh. 

Liverpool chuan an duh ber Premier League nomawi an chawi tawh a, City erawh tun season-ah League Cup bak champion an la nei lo - Pep tan fiamthu nuih ralpui a, a tak ram hmachhawn hun a thleng ta.

Season hmasa Champions League group stage-ah khan City hi Lyon nen an awm ho a, Pep Guardiola nauten French club lakah inchhuanna tur an nei lo - vawi hnih an inkhelhah an chak zo lo ve ve. 

Etihad Stadium-ah Lyon hian 2-1 in hnehna an chang a, an mualah 2-2 in an inhnehtawkpui leh bawk. Season hmasa an thawnthu hi an inhrilh nawn leh ang a, infuih phur nan an hmang ang. 

City midfielder Bernardo Silva chuan, "Ligue 1-ah season thum ka khelh chhung khan Lyon hi ka hrechiang hman viau a, hmachhawn nuam an ni ngai lo. Season hmasaah pawh khan vawi hnih kan hmachhawn a, kan chak zo lo ve ve a ni," a ti a, fimkhur a ngai tih a hai lo. 

City hian an striker chhuanvawr Sergio Aguero chu hliam vangin an la chhawr thei dawn lo a, mahse Argentine striker awm loh hlana khel ṭha tak Gabriel Jesus a awm avangin lungphanna tur erawh niin a lang lo. 

Brazilian striker Jesus hian tun season Champions League-a match sarih a khelh tawhah goal ruk khungin assist vawi thum a nei tawh a, Raheem Sterling leh Kevin De Bruyne ringawt pawh hi chakpui tham an ni bawk. 

Hrem tawk Benjamin Mendy chu Lyon hmachhawn turin a lo kir leh thei tawh dawn a, a khelhnaa khel turin Joao Cancelo leh Oleksandr Zinchenko an awm sa tho bawk avangin City tan buaina tur a awm lo. 

Manchester United-a hlawhchham Memphis Depay-a'n Ligue 1 club lamah a vanglai a hmang mek a, Arsenal leh Borussia Dortmund chil ti puttu forward hian tun season inelna hrang hrangah match 20 khelin goal 15 a khung a, assist vawi hnih a nei. 

Champions League bikah match ruk chhung chu a zawnin goal a khung tawh bawk a, a nep lo - Real Madrid hnehtu City-in Dutch forward ven uluk an mamawh a, vawi khat tihsuala khingpui hrem thei a ni. 

Celtic lama hming lo chher tawh Moussa Dembele lam hmaih a harsa - tun season-a match 44-a khelhah goal 22 a khung tawh a, assist vawi sarih a nei bawk. City right back Kyle Walker chuan, "Vawi hnih inhmachhawna Juventus hneh tur chuan team ṭha nih a ngai a ni," tiin Juve hnawtchhuaktu Lyon nena an inkhel tur chu lak lap chi a nih loh thu a sawi.