T20 World Cup Vawiin atangin Super 10, India hmaah Kiwis

Zanin dar 7:30-ah ICC World T20 Super 10 match hma-sa ber khelh a ni dawn a, inelna thlengtu India chuan New Zealand an hmachhawn ang.

Nagpur khawpuia khel tur India tan T20 match-a an la hneh ngai miah lo New Zealand hneh theihna hun ṭha a ni a, MS Dhoni kaihhruaina hnuaia khel tur India-in an hun ṭha neih hi bawhpelh an duh lo ang.

Chak mamawh

Team pahnihin champion an tum a nih chuan an match hmasa ber aṭanga chak nghal a ngai dawn a, vawi khat chak loh a pawi thui thei ang. Group 2-ah India leh New Zealand hi Pakistan leh Australia-te nen an awm ho a, group stage aṭangin Oman hnehtu Bangladesh-in an zawm ve bawk.

Team ṭha Kiwis

Hun rei tak chhung Kiwis innghahna Brendon McCullum-a'n February thla khan international cricket a chawlhsan a, an captain hlui a awm tak loh avangin New Zealand-in Kane Williamson-a kaihhruaina hnuaiah an khel ang.

McCullum awm tawh lo mah se Kiwis-in T20-a batsman ṭha ber pawl Martin Guptill , ball vaw na thei tak Colin Munro, tawnhriat ngah Ross Taylor, engtiklai pawha innghah ngamna Grant Elliot, run siam nuam ti tak Corey Anderson leh Luke Ronchi-te an la nei cheu a, bowling lamah spinner ṭha ṭhiau Nathan MCullum, Ish Sodhi leh Mitchell Santner-te hi Indian batsman chhaih mangang turin an ṭha tawk.

India an duai lo

Mahni khelmuala khel tur India an duai bik lo. T20 World Cup khelh a nih hmain T20 series-ah Australia leh Sri Lanka an hneh a, Asia Cup nomawi an chawi bawk.

Mahse, India hian T20 World Cup khelh nana an warm up match hmasa bera West Indies an hneh hnuah South Africa chu run li lekin an hneh lo a, New Zealand lakah insiamṭhat an tum ang.

Men in Blue batting line-up ah Shikhar Dhawan, Rohit Sharma, Yuvraj Singh, Virat Kohli leh MS Dhoni-te an awm miau avangin Kiwis bowler tan hna a awlsam dawn lo.

India buaina erawh an bow-ling lam a ni a, Kiwis bats-man-te chhaih mangang tur chuan Harbhajan Singh, Hardik Pandya leh Ashish Nehra-te ho chet ṭhat a pawimawh dawn.

Squads

India

MS Dhoni (c), Rohit Sharma, Yuvraj Singh, Virat Kohli, Suresh Raina, Ravichandran Ashwin, Ravindra Jadeja, Hardik Pandya, Ashish Nehra, Jasprit Bumrah, Mohammed Shami, Ajinkya Rahane, Harbhajan Singh, Shikhar Dhawan, Pawan Negi.

New Zealand

Kane Williamson (c), Martin Guptill, Grant Elliott, Corey Anderson, Adam Milne, Mitchell McClenaghan, Ross Taylor, Nathan McCullum, Luke Ronchi, Colin Munro, Trent Boult, Mitchell Santner, Ish Sodhi, Tim Southee, Henry Nicholls.

Super 10-a inlan tur Bangladesh

T20 World Cup group stage aṭanga Super 10 khel tura Afghanistan an invuak kai hnuah Bangladesh-in Oman hnehin an invaw kai ve leh ta.

Pathianni zan khan Bangladesh hian Oman chu run 54-in an hneh a, Himachal Pradesh Cricket Association Stadium, Dharamsala-a inkhelah century siamtu Tamim Iqbal a langsar fal hle.

Bangladesh hian over 20-ah run 180 an siam a, mi pahnih chian an hloh. Bangladesh tan Tamim Iqbal a che ṭha fal a, kum 26-a upa batsman hian ball 63 a hmachhawnah run 103 vaw chhuakin a tawp thleng a dam.

Oman batsman-te'n Bangladeshi bowler-te an chai hleithei lo a, over 12-ah run 65 chiah siama mi pakua an hloh tihin ruah surin a ti buai a, DL method hmangin Bangladesh chak zawkah puan an ni.

Bangladeshi bowler zingah Sabbir Rahman a cheṭha a, kum 24-a upa legbreak bowler hian over thum a vawmah run 15 lek pein wicket li a la a, Oman batsman-te'n an chai hleithei meuh lo.

Group A inkhel awmze nei tawh loah Netherlands leh Ireland an inhmachhawn bawk a, Netherlands hian run 12-a hnehna changin T20 World Cup an mangṭha.