Villa mualphona belhchhahtu Kane-a goal hnih
Season thara Premier League khel zel turin Aston Villa din-hmun a duhawm lo tual tual a, league nomawi chawi tura Tottenham zinkawng erawh a dik chho zel.
Pathianni zan khan Tottenham chuan khualmualah 2-0 in Aston Villa an hneh a, Spurs goal hnih hi a khungtu chu Harry Kane niin English striker a langsar zel.
London club hian point hnih chiahin hmahruaitu Leicester an phak lo ta a, an inthlauhna erawh nizana inkhel Foxes result a zirin danglam leh thei a ni.
Spurs tan Kane & Alli
Tottenham-in an nomawi bei-seina an chhit nunna kawngah English player pahnih Harry Kane leh Dele Alli-te'n an thawh-hlawk a, player pahnih hi inkhelh chhunga langsar ber an ni.
Inkhel ṭan aṭanga minute 45-na lekah Kane-a'n goal a khung a, a goal khung hi Alli-a'n a free-kick hlawhchhuah rang taka a pet niin ball petu Alli leh goal khungtu Kane-te an in man hle.
Second half ṭan aṭanga minute 3-naah Kane-a'n goal a khung lehnghal a, Spurs goal hnihna hi Alli-a'n English striker tana a siamsak tho a ni.
Harry Kane-a'n tun season league match-ah goal 19 khungin Premier League-ah Jamie Vardy nen goal khung hnem ber an ni mek. Kane-a goal khung 19 zinga 18 hi a league match hnuhnung 21-a a thun niin Villa-in an match hnuhnung 21-a goal an khung aiin vawi liin a khung tam zawk.
Kum 19-a upa Alli-a'n tun season league match-ah assist vawi riat a nei ta a, Premier League-ah assist nei ngah panga-na dinhmun luahin English player zingah amah aia assist ngah an awm rih lo.
Villa an chuai
Aston Villa-in February 6-a Norwich City an hneh khan fan-te chuan beiseina sang tak nen an team hi an tho chhuak dawn niin an ngai hman a, mahse Villa fan-te beiseina erawh a thamral ta - Spurs an hneh lohna hi Norwich an hneh hnua match nga chhung a zawna an tlawmna a ni ta.
Villa hian tun season-ah match 20 chhung chu tlawm hmel an hmu ta a, Premier Lea-gue chanchina season khata an tlawm hnem ber record an nihrual. Premier League-ah match riat chiah khelh tur a awm tawh avangin Villa hi season tharah Championship lamah an inlan a nih pawhin a mak lo ang.
Eng nge an sawi?
Aston Villa manager Remi Garde chuan, "Kan result-in duhthu a sam lo tih hi phat rual a ni lo a, mahse minute 90 chhung khan tun hnaia kan khelh dan ai chuan kan khel ṭha zawk a ni. Ka player-te'n theihtawp an chhuah chungin an chak thei lo a, pawi ka ti hle. Post vawi hnih lai kan pet per a, kan vanduai a ni. A harsa tawh dawn tih ka hria a, mahse chhiarkawp dana chhutin season tharah Premier League kan la khel thei a, minute tawp thlengin theihtawp kan chhuah chhunzawm zel ang," tiin an la tlawm loh thu a sawi.
Tottenham manager Mauricio Pochettino chuan, "Tun hnaia result duhawm lo tak tak kan neih hnu lawkah hnehna changin point thum kan hlawh chhuak a, ka lawm hle. Chance tam tak insiam chungin kan khel ṭha a, team tlak hlau tak kan hmachhawn avangin inkhelh a harsa a, mahse kan rilru puthmang avang khan ka lawm hle a ni. Hnehna chang chho zel turin kan khel ang a, kan fan-te mumang ram hi a tak ram a thlen theih nan rim taka kan beih zel a ngai a ni," tiin league nomawi chawi ngei a tum hle.