Champions League Thlirlawkna Man City mikhual tur Dynamo Kiev

Zanin dar 1:15 hian Champions League last 16 second leg inkhel pahnih a awm dawn. Manchester City chuan Ukrainian club Dynamo Kiev an lo mikhual ang a, Spanish Club ṭha Atletico Madrid chuan Dutch club PSV Eindhoven an lo mikhual bawk ang.

City a chiang?

Manuel Pellegrini nau-te hi quarterfinal lut tur chiang tawha ngaih theih an ni. City hian first leg-ah Sergio Aguero, David Silva leh Yaya Toure-te goal khung hmangin 3-1 in khualmualah hnehna an lo va chang tawh. Kiev hian England-a an zin chhuah hnuhnung 13-ah vawi khat mah hnehna an la chang lo a, vawi 11 chak lo zawkah ṭangin vawi hnih chu an inhnehtawk a ni.

Hetih lai hian City tan ngaihṭha taka awm theih a ni ringawt bik lo, an match hnuhnung berah Norwich City chu goal awm loa an inhnehtawk pui bakah an khelmuala Champions League match an khelh hnuhnung vawi 17-ah ṭum khat chiah clean sheet an nei thei.

City hian tun season-ah League Cup tiltle la tawh mah se Premier Legue-ah hmahruitu Leicester City chu point kua zeta an phak loh mek avangin champion beiseina an nei sang tawh lo. FA Cup-ah an tlak tawh bawk avangin Champions League hi an beisei neih chhun ang a ni tawh.

Tun dinhmunah Kevin De Bruyne, Samir Nasri leh Fabian Delph-te chu hliam vangin an la chhawr theih a beiseiawm loh a, Raheen Sterling leh Kelechi Iheanacho-te hmel hmuh theih beisei a ni thung.

Atletico chiang lo

Atletico manager Die-go Simeone-a'n Nether-lands-a goal awm loa an inhnehtawk hnuah second leg-ah chuan goal an khung tawh tur thu leh an dinhmun a ṭhat zawk thu a sawi a, zanin hian fiahna an hmachhawn dawn a ni. Atletico Madrid hian a zawnin Champions League knockout stage vawi thum an lut a, an club record thar a ni.

PSV nen an inhneh-tawk thuah Atletico hian match li khel leh tawhin hnehna an chang fai vek a, an match hnuhnung berah Inrinni khan Deportivo La Coruna chu 3-0 a an sawp avangin zanin hian in-rin-tawkna sang tak nen mikhual an lo thleng thei dawn.

Atletico midfielder Saul Niguez chuan, "Kan boruak a ṭhain inrin-tawkna kan nei sang em em a, quarterfinal hi kan luh theih ngei pawh ka ring," a ti.

Liverpool striker hlui Fernando Torres chuan a khupah hliam a tawrh avangin PSV a hmachhawn theih dawn leh dawn loh a la chiang lo a, Stefan Savic leh Tiago-te pawh hliam vangin an inkhel thei lo bawk ang.