French champion Paris St-Germain

Paris St-Germain chuan a zawna a vawi li nan French Ligue 1 nomawi an chawi a, Pathianni zan khan khualmualah Troyes chu 9-0 in an sawp a ni.

PSG hian Edinson Cavani, Javier Pastore leh Adrien Ra--biot te goal hmangin ṭan aṭanga minute 19 chhungin 3-0 in hma an hruai hman a, Zlatan Ibrahimovic chuan second half-ah goal li khungin Matthieu Saunier-a'n anmahni lamah a tih luh palh bakah Cavani chuan a goal hnihna a khung zui bawk.

Tun season-ah PSG hian Ligue 1-ah hnehsawh takin ro an rel a, match 30 khelh aṭanga point 77 hmuin khelh hmabak match riat la awm mah se pahnihna AS Monaco (52) tan lehpelh ngaihna a awm tawh lo. Europe-a league lian zual panga zingah PSG aia champion nomawi chawi hma thei hi an la awm ngai lo a, tun ṭum hi an club chanchinah league title vawi ruk an lakna chiah a ni.

PSG coach Laurent Blanc chuan, "Kan duh dan leh tum dan taka kan khelh theih avangin a lawmawm. Kan tih ang hi chu midang tan tih a harsa tawh hle ang. Kan hriat-reng tur erawh chu season a la tawp lo a, hnuhma ṭha hnutchhiah turin inthlahdah loa kan khelh tluan a pawimawh," tiin season tawp thlenga ṭha taka khelh chhunzawmtir a tum thu a sawi.

Champion kalkawng

Laurent Blanc-a naute hian tun season league match-ah vawi khat chiah chak loh an la nei a, Lyon 2-1 in an hneh lo. Match 30 an khelh tawh aṭangin vawi 24 zet hnehna an chang thei a, goal difference 62 zet an nei a, goal 15 chiah an chhuah a ni.

An champion theih nan hian striker Ibrahimovic chuan match 25 a khelh aṭangin goal 31 a khung a, Cavani chuan match 27 a khelh aṭangin goal 16 a khung bawk.

Ibra hmalam a chiang lo?

PSG champion tluk zetin kum 34-a upa Ibrahimovic hmalam hun turin sawi zui a hlawh nghal a, player chanchin ngah ve tak hi season tharah chuan Paris-ah a hmel kan hmu tawhin a rinawm loh hle.

Sweden international hi tun season tawp rual hian a contract neih lai hi a tawp tawh dawn a, Manchester United bakah Major League Soccer lam nen sawi zawm a ni.

A hma hun chungchang sawiin Ibra chuan, "He hmunah hian thla khat leh a chanve chiah cham turin hun ka nei tawh. Season tharah chuan he hmunah hian ka awm tawh lo ang. 'Eiffel Tower' hi ka lema an thlak te a nih chuan ka la cham chhunzawm ang chu," tiin a rilru a siam fel tawhah a ngaih theih.

PSG president Nasser Al-Khelaifi chuan, "Zlatan hi player ṭha leh danglam bik a ni a, ken hnehna la cham turin kan duh. Amah nen inbiakna kan nei ang a, a duh dan te hriaiin chelh kan tum dawn," a ti ve thung.

Ibrahimovic hian PSG tan league match 115 khelh tawhin goal 102 a khung tawh a, club chanchinah goal khung hnem ber a nih bakah assists vawi 35 zet a nei tawh bawk.

Qatar sumdawng hausa Al-Khelaifi chuan an hmabak sawi chhunzawmin, "Tunah hian Cham-pions League, French Lea-gue Cup leh French Cup-ah te champion kan la inbeisei vek a, heng zinga kan ngaih pawimawh leh duh ber chu UCL title a ni," a ti.

PSG hian Champions League last 16-ah Chelsea chu 4-2 a hnehin quarterfinal an inpet kai tawh a ni.