Napoli-in Juve um ve zel

Italian Serie A-ah champion lai Juventus chuan hmahruai zel mah se an hnuai chiaha awm Napoli chuan an um ve zel a, Pathianni zan khan Gonzalo Higuain penalty chhuih luh hmangin Palermo 1-0 in an hneh.

Real Madrid striker hlui hian minute 22-ah goal awmchun hi a chhuih lut. Penalty hi Sinisa Andelkovic-a'n Raul Albiol a tih tluk vanga a chawi a ni. Tun season-ah Argentine international hian league goal 27 a khung tling der tawh a ni.

Zirtawpni zan khan Juve hian Sassuolo 1-0 in an lo hneh tawh a, match 29 khelh tawh aṭangin point 67 an hlawh chhuak tawh. Napoli hian khelh zat inangah point thumin an phak lo mek a, match kua ngawt khelh tur a la awm avangin champion tur a la hriat loh.

Inkhel dangah Roma chuan Edin Dzeko leh Alessandro Florenzi te goal khung hmangin Udinese an hneh a, point 59 hmuin table-ah pathumna dinhmun an luah a, season thara Champions League khel thei turin an dinhmun an sawh nghet.

Inter chak, Milan chak zo lo

Inter Milan chuan second half-a Ivan Perisic leh Danilo D'Ambrosio goal khung hmangin Bologna 2-1 in an hneh a, Roberto Mancini naute hi table-ah panga na niin pathumna Roma chu point ngain an phak lo mek.

AC Milan chuan Chie-vo lakah goal an khung theih loh chhunzawm zel a, goal lut lo a an in-hnehtawk avangin Champions League khel thei dinhmun chu point kua zetin an thlau ta. Team pahnihte hi Serie A match-a an intawn hnuhung pathumah goal a lut miah lo a ni.