Real chak hram, Valencia chak zo lo
Pathianni zan La Liga inkhelah Real Madrid-in hnehna an chang hram a, hun tawp dawn a Casemiro goal khung hmangin Las Palmas chu 2-1 in an hneh.
Valeron an chawimawi
Inkhel ṭan hmain player ropui bik chawimawina neih a ni a, Las Palmas midfielder Juan Carlos Valeron chu La Liga match 400 a khelh tlin theih avangin chawimawina an hlan.
Kum 40-a upa nichunga La Liga-a player upa ber ni mek hian March 2-a Getafe 4-0 a an sawp ṭumin La Liga bika a match 400-na a khel tling a ni. Spain tana vawi 46 lai inlan thei midfielder hi Spanish midfielder ropui an sawi apiangin sawi hmaih a ni ngai lo.
Inkhel chu
Las Palmas khelmuala inkhelah Real Madrid-in minute 27-na lekah goal hmahruai an khung nghal a, goal khungtu hi captain Sergio Ramos a ni.
Real Madrid-in an players ṭha rual chhawr mah se Las Palmas tlarhnung an su hawng zo meuh lo a, minute 87-naah beisei loh zawk mualneitu team-in Willian Jose hmangin an si phurh sutna goal an khung.
Mahse, Real-in si an phur rei lo. Hun tawp nan minute a tam tawh lo tih hriain Las Palmas lam an nawr nghal a, goal an chhuah aṭanga minute hnihnaah Casemiro chuan corner aṭanga ball lokal chu a tauh lut.
Hun pek belhah Sergio Ramos chu a yellow card pahnihna avangin hnawhchhuah ni mah se Las Palmas tan hun a tep ter hret tawh a, an si phurh sut zawhna hun a awm tawh lo.
Zidane a lawm lo
Real Madrid coach Zinedine Zidane chuan, "Kan tana pawi-mawh ber chu point thum kan hlawh chhuak kha a ni a, ka buaina ber erawh second half-a kan khelh dan kha a ni. Las Palmas khan an khel ṭha tih ka pha lo a, chumi ruala lawmawm loh chu kan khelh chhuah dan kha a ni. Thil ropui tak tih kan duh a nih chuan kha aia ṭha zawk khan kan khel tur a ni," tiin a naute khelh danah a lawm lo hle.
Valencia an tlawm
La Liga inkhel dangah Gary Neville-a nauten chak result an hlawh chhuak zo lo a, Derby match-ah league table mawngphah luahtu Levante chu 1-0 in an hneh zo lo.
Levante tan he inkhela goal awmchhun hi Giuseppe Rossi khung a ni a, Italian striker hi Manchester United tan a khelh laiin Valencia manager Neville-te nen an lo khel ho tawh ṭhin.
Kum 29-a upa striker hian goal a khung bakah post a pet per bawk a, Deyverson leh Zouhair Feddal-te goal shot ṭha tak chu Valencia keeper Diego Alves-a'n a dan sak avangin Valencia an muahlpho lo zawk.
Valencia dinhmun a duhawm lo ta hle a, kum 1987-88 season-a 14-na nichunga season an khar hnua an season khar chhiat ber tawng thei dinhmunah an ding mek.
English manager Gary Ne-ville-a'n a naute khelh danah lawmna tur a awm loh thu sawiin, "Kan khelh dan kha sawi mawi leh phat ngaihna pawh awm lo a ni a, kan khel chhe takzet a ni. Kan result-ah hian mawhphurtu ber chu keimah ka ni a, fan-te hnenah ngaihdam ka dil a ni," tiin chhuanlam a siam lo.