Inkhelh laiin Dortmund fan a thi

Pathianni zan Bundesliga inkhelah Borussia Dortmund chuan Marco Reus leh Shinji Kagawa te goal khung hmangin Mainz 2-0 in an hneh a, inkhelh laklawh laiin Dortmund fan pakhat chu lung-phu chawl vangin a thi.

Signal Iduna Park-a inkhelah fan thih thu hriat a nih hnuah stand-a awmte chuan ngawi reng-in inkhel an en zui a, fan pakhat pawh buaipui ngaiin awm mah se damdawi-in pan pui a nih hnuah a dinhmun a ṭha thung. Fan 80,000 rual phungkhawm chuan inkhelh tawp dawnah 'You'll Never Walk Alone' hla an sa rual a ni.

Thuchhuah siamin Dort-mund chuan, "In-khelh lai khan chanchin lungchhiat thlak tak pahnih hriat a ni a, pakhat zawk nunna chhan theih a nih loh laiin pakhat erawh enkawl theih a ni hlauh thung. Kan tan chuan a lungngaih thlak tak zet," tiin hnehna chang mah se an fan thih vanga hreh-awm an tih thu an sawi.

Dortmund manager Thomas Tuchel chuan, "A chang chuan hringnunah hian football aia pawi-mawh a awm chang a awm ṭhin. Chhiattawk chhungte ka tawrhpui em em a, kan thil tawn khan kan inpumkhatna a ti lang chiang hle thung," a ti.

Mainz boss Martin Schimdt pawhin tawrh-puina thu sawiin, "Thih-na thleng khan pum-khatah min hruai a, mi zawng zawng khan kan tawrhpuiin kan khawngaih em em a ni. A kal san chhungte chunga thlamuanna awm rawh se," tiin a sawi.

Fan thih vangin lung-ngai mah se tun laiah Dortmund hian result an nei ṭha thei hle, thla-sik chawlh hnuah league match kua khel tawhin goal hnih chiah an la chhuah; an khelmual bikah an league match khelh hnuhnung vawi 17-ah chak loh an nei miah lo bawk a ni.

Dortmund hian tun season-ah Bundesliga match 26 an khelh tawh aṭangin point 61 an hmu tawh a, hmahruaitu Bayern Munich chu point ngain an phak lo mek a, league title an beiseina an la chhawm nung zel a ni.