FA Cup Arsenal - OUT; Manchester United - ?

Emirates Stadium-ah Wat-ford-in Arsenal an bara-khaih a, FA Cup champion lai hi Hornets-in Odion Ighalo leh Adlene Guedioura te goal hmangin an pet chhuak. FA Cup-ah inelna ṭantirha cham-pion rinkai ni pha lo ṭhiau Crystal Palace, Everton leh Watford ten Wembley Stadium an thlen hnuah Manchester United chu champion thei zinga club lian fal ber ni mah se Old Trafford-ah West Ham an draw hram.

Pathianni zan FA Cup quar-ter-final result a ngaihnawm a, Red Devils leh Hammers ten Upton Park-a replay an khelh hun chu Europa League-a Manchester United leh Liver-pool te inkhel result a hriat theih hnuah chauh tihchian a ni ang.

FA Cup semifinal fixture draw hi nizan khan neih a ni a, April 23 leh April 24 hian Wembley Stadium-ah khelh a ni ang.

Puitling lo zia?

Arsenal-in game mawi nen bul an ṭan a, Watford-in vanneih beiseiin awmze neiin defensive game an khel thung. Gunners an thiam zawk tih a lang a, Hornets tlarhnung phui ṭha tak chu Mesut Ozil thiam vangin paltlang ni mah se Mohamed Elneny-a'n a man tlawm na bak phochhuah tur a nei lo.

Arsene Wenger-a hoten in-khel an thunun a, Petr Cech leh Laurent Koscielny tel chung pawha an tlarhnung a chhuanawm loh tehreng nen rinrawl pahnih tel lo phei chuan buai lohna turah an buai zeuh zeuh.

First half-ah Hornets for-ward Troy Deeney leh Odion Ighalo te bil deuh mah se minute 50-naah Deeney-a'n Nigerian striker siam turin Arsenal defender Calum Chambers leh Per Mertesacker te a zuan khum a, Ighalo-a'n tharum hmanga Gabriel patlangin goal hmahruai a khung. Kumin bika goal khung harsat Ighalo-a'n minute 599 hnuah goal a khung leh ta a, tun season-a a khung zat erawh goal 17 lawih a ni.

Goal hnihna erawh Gue-dioura ball pet a kawh lutuk avangin Arsenal defender sawisel theih a ni lo. Minute 63-naa goal hnih luh hnuah Danny Welbeck, Theo Walcott leh Alex Iwobi te an lut a, inkhel a nung sawt.

Arsenal ṭan a tlai a, Watford tlarhnung khawng ṭha mah se Ozil-a backheel mawi lutuk dan theih a ni lo a, minute 88-naa Welbeck-a goal-in Gunners beiseina a siam a. Amaherawhchu United player hlui hian goal ruakah a khung lo a, Arsenal an thochhuak thei lo a, an puitlin tawk lohna a lang.

Watford hi Manchester United pawhin tun hnaiah Old Trafford-ah an hneh thei a, league hmahruaitu Leicester City phei chuan an mual Vicarage Road-ah harsatna nei loin an hneh.

Arsenal boss Arsene Wenger chuan, "Chak kan phu nia kan hriat niah kan beiseina chu tihtawpin a awm a, an chance neih hmang ṭankaitu Watford-in fak an phu. Kan rilru natna chhan ber chu theihtawp kan chhuah chunga kan chak lo hi a ni," tiin a sawi.

Gunners-in Highbury
aṭanga Emirates Stadium-a an insuan luh hnuah a vawi khat nan a zawnin match thum an chak lo. Watford an hneh loh hmain Arsenal hian Swansea leh Barcelona an hneh lo a ni.

Beiseina siamtu Martial

Manchester United leh West Ham te hun tawpa 1-1 an inhnehtawk meuh chuan minute 83-naa United beiseina siamtu Anthony Martial-a'n fak a hlawh dawn tih a chiang a, minute 90 chhunga ropui zawk erawh minute 83-naa Hammers tana freekick aṭanga mawi taka khungtu Dimitri Payet a ni.

Upton Park lamah chuan 'Payet kan nei - Dimitri Payet' tih chu an hla pui a ni tawh a, Marseille aṭanga pound maktaduai 10 pel hreta an lakluh hi London-ah chuan 'star' a ni. Old Trafford-a Hammers fan 9000 bawr vel pawhin French midfielder hi an chhuang hle.

Chutihrualin referee Martin Atkinson-a thutlukna erawhin sawisel a hlawh zui hle. Second half ṭantirha Marcos Rojo tackle vanga penalty beiseia tlu Payet chu United lamin tluk der vangin yellow card vawi hnihna chawi turah an ngai a, West Ham lam erawhin penalty ni ngei turah an ngai thung.

Referee tawnhriat nei ṭha Atkinson-a'n thutlukna dik lo a siam nual niin a lang a, Payet-a'n counter attack aṭangin goal hnihna khung thei tur nei mah se referee-in foul a ham sak a. United goal khungnaah pawh hian Bastian Schweinsteiger-a'n West Ham goalkeeper Darren Randolph dang mah se foul pek a ni lo.

Manchester United boss Van Gaal chuan, "West Brom leh Liverpool kan hneh loh hnua kan khelh leh danah ka player-te ka fak hle. Kan rilru put hmang a dik a, tun season chu referee thutlukna dik lo kan vanduai pui a ni," tiin a sawi.

United game hi German midfielder Schweini-a'n huai-sennain a thlak danglam a, ṭum dang ang bawkin David de Gea a pawimawh leh bawk.

West Ham boss Slaven Bilic chuan, "Referee khan penal-ty min pe tur a ni a, Schweinsteiger-a foul kha a ham bawk tur a ni. Tunah chuan kan stadium-a inkhel tur kan nih avangin kan inringtawk lehzual dawn a, kan stadium-a FA Cup match hnuhnung ber a nih dawn avangin replay match hi kan tan chuan a special dawn a ni," tiin a sawi.

Season tharah West Ham-in an ground hman lai Boleyn Ground (Upton Park) chhuahsanin Olympic Stadium an hmang tawh dawn a, semifinal aṭangin Wembley Stadium-a khelh a nih dawn avangin Hammers tan chuan an inkhel leh tur hi a pawimawh hle.