Djokovic a chak hram

Novak Djokovic chuan Pathianni zan khan BNP Paribas Open-ah a match hmasa ber a khel a, Bjorn Fratangelo lakah set hmasa ber hloh mah se hnehna a chang hram.

World number 1 Djokovic hian 2-6, 6-1, 6-2 a hnehna changin third round a inhlang kai a, Philipp Kohlschreiber a hmachhawn zui ang. Novak hi Indian Wells-ah hian vawi li ngawt a lo champion tawh a, kuminah hian title a la leh thei a nih chuan he tournament-a mimal champion hnem ber record a siam ang.

Serbian thiampuipa hi Dubai Open-a Feliciano Lopez nen an inkhelh ṭumin a mit (eye) na vangin a inkhel tluan thei lo a, hemi hnua ATP World Tour-a a inlan lehna hmasa ber a ni.

Kum 28-a upa Djoko-vic chuan, "Bjorn khan ruahmanna fel tak nei saiin min hmachhawn a, kei aiin bul a ṭan ṭhat vangin ka buai tih phat buai a ngai lo. A service
aṭanga point 17 hmuh theih aṭangin point 16 ngawt a hmu a ni. Mahse, set hnihna aṭang kha chuan inkhel dang daih angin bul ka ṭan a, a tawpah ka ding-chang hram," tiin a sawi.

Nadal chak

Rafael Nadal pawhin a match hmasa berah fiahna a hmachhawn nghal a, Gilles Muller lakah 6-2, 2-6, 6-4 in hnehna a chang hram. Indian Wells title vawi thum la tawh Nadal hian third round-ah chuan Fernando Verdasco a hmachhawn leh dawn a ni.

Inkhel dangah Japa-nese star Kei Nishikori-a'n 6-3, 6-3 in Mikhail Kukushkin lakah hnehna a chang a, Jo-Wilfried Tsonga pawhin Vincent Millot chu 7-5, 6-1 a hnehin; Dominic Thiem-a'n Jozef Kovalik lakah 7-6, 7-6 in hnehna a chang ve bawk.