DSK an chak, table mawngphahah Aizawl FC

DSK Shivajians-in an match hnuhnung bera East Bengal an hneh hnuin Pathianni zan I League inkhelah Douhou Pierre goal hnih leh Aser Dipanda te goal hmangin an mualah Sporting Goa chu 3-1 in an hneh.

Pune khaw club hian North East club Aizawl FC leh Shillong Lajong te zuan khumin pasarihnaah an inhlangkai a, thlirna dang aṭang chuan DSK hi an tlak theih chuang loh avangin MPL champion tan zam phahna tur a awm lo.

DSK tan Mizo tlangval pahnih Zohming-liana Ralte leh Lalhmangaihsanga Ralte-te chuan inkhel bul ṭanin hun tawp thleng khelmual chhungah an inlan a ni.

Pathianni zan inkhel dangah Mohun Bagan-in Yusa Katsumi leh Sony Norde te goal hmangin an mualah Mumbai FC chu 2-0 in an hneh bawk.

Kolkata club goal hmahruai Japanese midfielder Katsumi khung hi Jeje Lalpekhlua siamsak a ni a, Mizo tlangval leh goal hnihna khungtu Norde hian chance ṭha dang an hlah bawk.

Barasat Stadium-a inkhelah Bagan fan-te'n match riat a team kaihruai thei lo tura an hrem leh nuai 10 an chawitir an coach Sanjoy Sen an thlawp thu an au chhuahpui a, fans sing rual pungkhawmin an coach hmaikawr vuah chungin "Aai AIFF Dekhe Jaa, Sanjoy Da'r Khomota" (AIFF lo en teh u a, Sanjoy Sen-a theihna chu lo thlir teh u) tiin India FA hotute an au el.

Mariners hian March 26 hian Mizoram an rawh tlawh dawn a, RG Stadium-ah league hmahruaitu Bagan hi table mawngphaha awm Aizawl FC-in an mikhual ang.