Zanin dar 8:00-ah MSL2 semifinal luh inchuh Khatla TBL Vs Zarkawt BCA

Mizoram Super League hmasa berah awlsam takin Khat^-la TBL leh Zarkawt BCA ten final an lut a, season hnihnaah erawh semifinal lut lo zawk an awm a nih pawhin a mak lo ang.

Zanin dar 8:00 hian Hawla Indoor Stadium, Republic Veng-thlangah Khatla TBL leh Zarkawt BCA an inhmachhawn dawn a, MSL1 final leh Marova Memorial Basketball final rematch a nih vang ringawt pawhin zanin inkhel tur hian ngaihven a hlawh a, semifinal ticket neih theihna inkhel a nih avangin zanin inkhel tur hi a pawimawh.

Khatla Vs Zarkawt

Khatla TBL hian ṭantu ngah ṭhin mah se MSL2-ah Tuikual South leh Mission Veng Vikings-te point-a an phak loh bakah supporter-ah pawh an er pha rih lo niin a lang.

Zarkawt BCA-in TBL an tluk pha lo veleh a, a zawna vawi hnih an chak loh avangin Chatlang Ryders an hneh ṭum phei chuan player au phur tham an thawk chhuak lo.

Marova Memorial Basket-ball-a an champion ṭumin MSL1-a ṭantu nei ṭha ber (?) Khatla TBL aiin BCA-in ṭantu an ngah zawk a, club-in a mamawh hunah an thawk chhuak ang em tih hi zawhna awm thei a ni. Zaninah Zarkawt leh Khatla mipui rilru put hmang a lang ang.

Hneh theih TBL

Khatla TBL-in Chaltlang Ry-ders leh Zarkawt Serpents hnehin bul an ṭan a, amaherawhchu MSL1 an champion ṭuma an player pawimawh Nelson Lalrohlua, Gospel Lalthawmmawia, R. Lalmalsawma leh Darliansanga-te tel lo an tuar tih a lang.

MSL-a chak zawn rei ber (match 9) record neitu TBL hi season hnihnaah erawh an chungnung fal tawh lo tih Mission Veng Vikings laka 71-86 a an tlawm ṭumin a lang chiang. Chutihrualin H. Lal-dinsanga leh Vanlalmuana-te an kawl a, player pahnih hi result thlak danglam thei an ni.

BCA harhtharna

Zarkawt BCA-in match hma-sa pahnihah rawlthar duhawm Matthew Remtluanga (Pupua) chungah an innghat nasa lutuk a, an chetsual phah. An match hnuhnung bera Chaltlang Ryders an sawp ṭumin senior player Michael F. Lalawmpuia, David Lalruatfela leh Jackson Lalrintluanga-te'n innghahna tlak an ni tih an pholang a, TBL lakah rin ngam an ni ang.

Chutihrualin thiam taka bigman Pupua bakah Henry Lalramngaihawma, Zorinsanga leh PC Lalmuansanga-te an hman thiam chuan BCA hian Khatla TBL hi Marova Memorial Basketball final ang thoin an hneh nawn thei ang.

Head to Head

MSL1

League Stage : TBL 64-61 BCA

League Stage : TBL 78-67 BCA

aMarova Memorial

Game 1 : BCA 72 - 71 TBL

Game 2 : BCA 58 - 71 TBL

Game 3 : BCA 101 - 87 TBL

BCA-in series 2-1 in an la.

MSL a ngaihnawm

• Zanin inkhelh zawh hian MSL2 club parukten vawi li ṭheuh an khel ang.

• TBL-in semifinal lut chiang turin BCA emaw Tuikual South emaw an hneh a ngai.

• BCA-in TBL an hneh lo a nih pawhin Serpents an hneh chuan semifinal ticket neih theih dan a awm a, innghah ngamna tur erawh a ni lo.

• Mission Veng Vikings leh Tuikual South-ten knockout stage lut tawh mah se an match hnuhnung bera an result-in semifinal-a an khingpui tur a nghawng phak avangin inthlah dah thei an la ni lo.

• MSL-ah point inang a awm a nih chuan head to head en tur a ni a, pakhat aia tam an awm a nih chuan point inangte inkhelh kualna bik goal average en tur a ni.