MotoGP Pathianni tlaiah Austrian Grand Prix

Champion lai Marc Marquez a la inlan thei dawn lo a, hmahruaitu Fabio Quartararo leh Valentino Rossi te erawhin Pathianni tlai dar 5:50-a tlan tur Austrian Grand Prix atan harsatna an nei lo - rider pahnih hian point lamah Marquez tlan pel zel an tum ang.

Khawchin thlirna aṭanga a lan dan chuan Pathianni hian Red Bull Ring velah ruah tam tak sur thei a ni a, khaw lum lam hi 28 degree celsius vel ni tura a lan bawk avangin tyre tlan pawh uluk a ngai dawn; Czech Republic nen chuan a boruak a inang dawn lo hle.

Covid-19 vangin season ṭan hun pangngaiah an ṭan thei lo a, July thla chawhnu lam khan a hmasa ber atan Spanish Grand Prix an tlan chauh - Jerez tlan kawngah Marquez a chesual a, point a hlawh chhuak lo.

Spanish tlangval hi a ban ruh tliak zai niin, hun rei vak lo hnuah rawn kir leh nghal tum mah se zai nawn a ngai. Intlansiak pali a tlan thei dawn lo tihna a ni a, a hma hun a la chiang thei lo; Repsol Honda chuan an bike khalh turin Stefan Bradl an hmang nawn leh ang.

Marquez aiawhtu Bradl chuan, "Ka chungah mawhphurhna sang leh rit tak a awm tih ka hria, a hmasa lamah beisei phak lo mah ila Red Bull Ring-ah chuan ṭha taka tlan theih tawh ka inbeisei," a ti. Intlansiak hnuhnung ber khan 18-na niin point a hmu phak lo.

Jerez tlan kawnga intlansiak pahnihah Fabio Quartararo a chak ber. French tlangval hian Czech Republic-ah beisei phak chiah lo mah se pasarihna a ni phak a, point 59 hmuin driver championship hmahruaitu a ni mek.

Quartararo chuan, "Boruak awm dan a danglam thut thut ṭhin a, tlan kawng huh leh roa a tlan dan pawh a inang lo hle. Ram danga kan tlan tawhna nena khaikhin chuan Austria hi kan tan hmun ṭha a ni kher lo mai thei.

"Eng pawh thleng thei a ni a, chutihrualin kan bike leh tyre hman chhut chuan a tawp tlan thlen theih hrim hrim a pawimawh ang," a ti. Hnehna chan duh mah se a ṭawng pawr ngam lo, an elpui Honda leh KTM tan hmun ṭha a nih a rin thu a sawi bawk.

Czech Republic-ah Brad Binder-a'n hnehna a chang a, bike intlansiakna sang bera a chak vawi khatna a ni bakah a team KTM tana hlawhtlinna thlen thei hmasa ber a ni bawk; Austria-ah pawh a lakah mipui mit a fu dawn.

South African tlangval Binder chuan, "Tawnhriat kan neih belh ve zel a, tun kar tawpa inelna neih turah pawh inrintawkna kan nei sangin beisei pawh kan nei lian viau mai. Team lamin ka chungah rinna an nghah ang ngeiin a chhanna pek leh ka 

tum ang.

"Red Bull Ring hi kan tan chuan mahni tlan kawng ang maia kan ngainat leh nuam tihna hmun a ni a, intlansiak kan neih chhinah pawh kan ti ṭha thawkhat viau chuan ka hria, team dang hneh thei turin kan ṭha ve tawk," a ti.