Benfica pan tur Vertonghen

Tottenham defender hlui Jan Vertonghen chuan Benfica a zawm dawn. Ningani zan khan medical a nei a, he thu i chhiar meuh chuan Portuguese club nen hian season thum daih contract an ziak fel tawh ang.

Kum 33 mi Vertonghen hian season riat a chamchilh hnuah Spurs a chhuahsan, Premier League club tan hian match 300 chuang khelhsak hmanin player pawimawh zingah a tel phak, season tawp rual khan a contract hmang zoin a chhuak zui nghal a ni.

Belgium international hian North London club tan hian nomawi chawi a nei lo. League Cup 2015 final lut mah se Chelsea an hneh lo, kum 2019 khan Champions League final meuh thleng mah se Liverpool ngam loin pahnihna dinhmun an luah.

Vertonghen chuan, "Ka ṭhian, ka inkhelhpui leh team tana hna thawk zawng zawngte an ngaihawm dawn hle. London khawpuiah sulhnu ka hnutchhiah ve thei kha ka lawm a, engtikah mah ka theihnghilh tawh lo ang," a ti.

Tottenham pawhin an defender chhuak ta hi thlahna thu an ziak a, an ui thu leh a kal zelna turah hlawhtlinna chang se an duhsak thu an tarlang ve bawk a ni.