Hamilton hneh nawn duh - Verstappen

Max Verstappen chuan Lewis Hmailton hneh nawn a tum a, tun kar tawpa Formula 1 Spanish Grand Prix an tlan hunah Mercedes driver pahnih hmaa tlan thlen leh ngei chu a duhthusam a nih thu a sawi.

Mercedes hian F1 an thunun rei ta viau, tun season-ah pawh inelna hmasa paliah Hamilton leh Valtteri Bottas ten hnehna an chang, inelna hnuhnung berah erawh Red Bull driver Verstappen a chak thung.

Dutch tlangval Verstappen chuan, "Tlan kawng a danglam tawh dawn a, kan tlan tawhna Silverstone nen chuan a inang dawn lo. Spain-ah hian Mercedes chu eng ang taka ṭha nge an ni tih fiah a chakawm ta hle.

"Barcelona-ah chuan khua a lumin tyre pawh a hek ṭhin, eng tiangin nge an rawn insiam danglam dawn hriat a ni lo. Keini lam chuan insiamrem theih kan in beisei viau thung," tiin an elpui Mercedes a cho hle. Season kal laiah Britain tlangval Hamilton-a'n hma a hruai mek a, pahnihnaah Verstappen awmin an inthlauhna chu point 30 a ni. Pathianni zan dar 6:40 hian Circuit de Barcelona-Catalunya-ah Spanish GP an tlan leh ang.