Arsenal tan 5% hmun a la awm?
Arsene Wenger-a'n Emirates Stadium-a an mikhual Barcelona 2-0 a an hneh loh hnuah Catalan club lian chuan 95%-a Champions League quarterfinal an luh thawh thu a sawi. Zanin dar 1:15 hian Nou Camp-ah Gunners hian beiseina 5% an la neih an chhem nung thei dawn em tih kan hmu dawn.
Dinhmun inang lo
Kum 1886 a din Arsenal hian an la chawi ngai loh Champions League nomawi hi tun season-ah an chawi dawn a nih chuan thil mak a thlen a ngai tawh. Zanina an hmachhawn tur Barcelona hian tun hnai season 10 chhungin UCL title hi vawi li ngawt an la thei a, kuminah an champion leh a nih chuan kum 1990 hnua AC Milan-in title an neih hlen hnua a vawi khat nan an kawl hlen ve thei dawn thung.
Arsenal hi an chak lo a nih chuan a zawna a vawi nga nan last 16 aṭangin pet chhuah an ni dawn a, Barca erawh an chak tlang a nih chuan a zawna a vawi kua nan quarterfinal an lut thung ang.
Gunners tan quarterfinal lut turin a tlem berah goal thum tal an thun a ngaih tawh laiin Barca tan erawh an goal hnih neih sa venhim a tawk a, Luis Enrique naute hian goal ven aia a khung lam an thiam zawk miau avangin attacking football an khel lehin a rinawm zawk.
Champions League-a Barce-lona goal khung hnuhnung 48 aṭanga goal 39 zet chu Lionel Messi, Luis Suarez leh Neymar te khung a ni a, anni pathum lo dan tum hi tlarhnung nem ve tak Arsenal tan thil hautak tur a ni tih a chiang.
Arsenal an zuih
January 4 khan Arsenal hi Premier League hmahruaitu an ni a, hemi hnu hian legaue match vawi khua an khelh aṭangin vawi hnih chiah hnehna an chang thei a, tun dinhmunah Leicester City leh Tottenham te hnuaiah an awm leh tawh.
Hei mai bakah hian tun hnai season hnih chhunga Wenger-a dinhmun chhanhimtu nia ngaih FA Cup quarterfinal-ah Watford hneh loin an tla leh tawh bawk a, Champions League-ah an mualpho nawn a, league tiltle an chawi lo a nih bawk chuan Gunners fan-te rilru a dam tawh kher lo ang.
Hmun ralṭi Nou Camp
Arsenal tan Barcelona khel-mual Nou Camp hi hmun ralṭi a ni. He hmunah hian vawi thum leng lut tawhin vawi hnih an tlawm a, vawi khat chu an inhnehtawk pui thung. Vawi khat mah hnehna an la chang ngai lo.
Champions League match bik-ah goal hnih aia tama Camp Nou-a Barcelona hneh thei awm chhun chu Bayern Munich chiah an la ni, German champion hian kum 2013 May thla khan 3-0 in an lo hneh tawh a, an khelmualah Barca hi hneh theih loh hulhual an ni bik lo.
Gunners hian an tlarhnung khulhpui pahnih keeper Petr Cech leh defender Laurent Kos-ciel-ny te chu hliam vangin an chhawr thei dawn lo a, tun laia hmatawng inkawp fuh ber tia sawi ngam MSN-te tan an hu-phurh-awm lo hle ang. Hetihlai hian Barca tlarhnung hotupa Gerard Pique chu hrem vanga a inlan theih dawn bik lo thung a ni.