Andy Murray a chak lo

World number 2 Andy Murray chu BNP Paribas Open third round aṭangin nek chhuahin a awm. Britain fachuam hian Thawhṭan zan khan Federico Delbonis a hneh lo a ni.

February thlaa fa a neih hnuah Murray hian a ATP tournament hmasa ber a khel a, Indian Wells-ah second round-ah harsatna tawk lutuk loin Granollers lakah hnehna chang thei mah se third round-ah world number 53 Delbonis lakah hian 6-4, 4-6, 7-6 in a chak lo.

Kum 28-a upa Murray hian hnehna a chang ngei dawnin a lang hman a, set thumna an khelh lai hian 4-1 in hma a hruai fal hman a, mahse tiebreak-ah 7-3 in a hloh ta tho a ni.

Grand Slam vawi hnih champion tawh Murray chuan, "Ka ball vuak a dik tawk loin tihsual ka nei hnem hle a, dinhmun ṭha zawkah ding hman mah ila ka vanneih ni a nih loh avangin a chak lo zawkah ka ṭan a ṭul. Delbonis kha player ṭha tak a nih avangin chak kha a phu hle," tiin a sawi.

Wawrinka chak

French Open champion lai Stan Wawrinka pawhin Andrey Kuznetsov chu 6-4, 7-6 a hnehin third round a paltlang bawk. World number 4 Wawrinka hian a match lehpekah chuan seeded 15-na David Goffin a hmachhawn leh ang.

Inkhel dangah Gael Monfils chuan Albert Ramos Vinolas lakah 6-1, 6-3 a hnehna changin a vawi khat nan BNP Paribas Open fourth rounh a inhlangkai. World number 7 pawh lo ni tawh Monfils hian ATP title panga lai a lo la ve tawh a, tun dinhmunah hian world number 17 a ni mek.

World number 1 Novak Djokovic chuan tukin zing dar 7:00 hian third round a khel ve dawn a, Philipp Kohlschreiber nen an inhmachhawn dawn a ni. Rafael Nadal pawh zing dar 3:30 khan Fernando Verdasco nen an inkhel bawk.