Vardy nena inel nuamti Kane

Tottenham Hotspur striker Harry Kane chuan Premier League golden boot award dawng tura Leicester City striker Jamie Vardy nena inel chu nuam a tih thu a sawi.

Kane leh Vardy-te hian Premier League-ah goal 19 ve ve an khung tawh a, striker pahnih hian season duhawm tak hmangin anni aia goal khung hnem Premier League-ah an la awm rih lo.

Kum 22-a upa Kane chuan, "Inelna nuam tak a ni a, golden boot dawng tura inel hi a hlimawmin inelna ṭha tak a ni. Goal khung hnem ber ni tura in el thei hi chu mi tlemte chauh an ni a, Jamie pawhin kan game apiang enin kei aia tam khung zel a duh ka ring tlat a ni," a ti.

English striker chuan sawi chhun-zawmin, "England squad-ah koh kan nih chuan Vardy nen hian kan inkawm ang. Mahse, professional player kan nih avangin a hranpa taka inbiak leh inkawmna kan nei hran lo a, kan in el reng a ni," tiin amah ang thoa English striker Vardy nen an inel thu a sawi.

Kane hian season hmasa khan league-ah goal 21 a khung a, tun season-ah bul a ṭan ṭhat loh avangin nasa takin sawisel tawk mah se amah sawiseltute khelmual chhungah goal hmangin a chhanglet zel.