United tan Rooney a lo kir thuai dawn

A khup hliam vanga February 13 hnua khelmual chhunga a hmel la lan leh lo Manchester United captain Wayne Rooney chuan inkhel leh tura a lo kir thuai a beisei thu a sawi.

United boss Louis van Gaal chuan a striker hi season tluana a inlan theih loh a hlauhthawn thu a lo sawi tawh a, England boss Roy Hodgson chuan Euro 2016 England squad-ah Rooney tel tur thu tichiang mah se a in fit hman loh a hlauhthawn thu a lo sawi tawh bawk.

Mahse, English striker chuan ruahman anga engkim a kaltluan thu sawiin, "Ruahman angin engkim a kaltluang a, ṭha taka ka inenkawl avangin hun rei ka mamawh tawhin ka ring lo. Ka lo kir hun tur chiang takin ka la sawi thei lo, international match-ah erawh ka inlan thei lo ang," tiin March 27 leh 30-a England-in Germany leh Netherlands friendly match an khelhpui hunah a inlan theih loh tur thu a sawi.

Kum 30-a upa striker chuan sawi chhunzawmin, "Kan rin ang em emin ka hliam a na hran lo a, mahse chumi avanga innawr luih vak erawh ka tum lo. Hliam na zawk a thlen a hlauhawm a ni. International break zawhah ka lo kir thei a nih chuan cup competition leh league match bakah England friendly match-te nen match 10 vel khelh tur a la awm dawn a, Euro 2016 a tan ṭha takin ka inpuahchah thei ang," tiin France-a Euro khelh tur a thlir lawk.