Bayern leh Guardiola dal tumtu Juve

European champion vawi nga ni tawh Bayern Munich leh Juventus te chu Turin-ah 2-2 in inhnehtawk mah se quarterfinal lut tura rinkai chu German champion an ni. Pep Guardiola hote hian last 16 an paltlang lo a nih chuan upset a ni ang.

Zanin dar 1:15 hian German champion Bayern leh Italian champion Juve te Allianz Arena-ah an inkhel dawn a, Ten Sports-ah a en theih ang.

Bayern-in Jupp Heynckes hnuaiah 2012-13 season khan Champions League, Bundesliga leh DFB Pokal-ah te an champion. Spanish coach ropui Guardiola-a'n kum hnih chhungin record
ṭha tak nei mah se treble champion thei coach Heynckes a thlak avangin hna zo thlapa season thara Manchester City zawm tur chuan kuminah Champions League nomawi a chawi a ṭul ang.

Turin-ah Thomas Muller leh Arjen Robben te goal hmangin Bayern-in darkar chanve chhung lekin hma hruai mah se Juventus-in Paulo Dybala leh substitute Stefano Sturaro te goal hmangin an sut. Italian manager Max Allegri hote hian Champions League-ah beisei tur nei mah se away goal rule hman a nih avangin chak tur chuan Germany-ah goal an khung ngei ngei a ṭul dawn.

Old Lady of Italy hian Zir-tawp-ni khan Paulo Dybala hmangin Sassuolo 1-0 in an hneh a, season bul ṭan ṭha lo mah se point thum laiin Serie A-ah hma an hruai leh tawh. Manchester United player hlui Patrice Evra chuan, "Pogba hian theihna a ngah a, a hlauthawng ngai lo a, ani anga player ṭha hi chuan Bayern anga team ṭha lakah pawh ball a dil zel a, team tan a ṭangkai. Tihsual a neih hian amah ber hian a hrethiam lo ṭhin a, a chanchin an sawi zui zel avangin a mak pawhin ka hre lo. Thawkrim se, inringtawk se, Allegri thusawi ngaithla se, a thiam dan angin khel se chu chu team tan leh ama tana ṭha ber a ni," tiin ram tana khelhpui Pogba chu team chakna a nih thu a sawi.

Bayern hian Mainz an hneh loh hnuah an elpui Bo-russia Dortmund an draw a, amaherawhchu result
ṭha an mamawh hunah tak an tho chhuak a, Inrinni khan Werder Bremen 5-0 in an sawp. German club tan hian Thiago Alcantara leh Thomas Muller ten goal hnih ve ve an khung a, Robert Lewandowski-a'n goal khat dang a khung ve bawk.

Loan hmanga Juventus aṭanga Bayern zawmtu Kingsley Coman-a'n Bremen an sawp ṭumin assist vawi thum a nei a, Chilean mid-fielder Arturo Vidal nen Bianconeri an hmachhawn ang. Juve striker Mario Mandzukic-a'n season hnih chhung a lo khelh tawhna German club a hmachhawn bawk ang.

Juventus hian season liam ta khan final an lut a, Bayern erawh--in Guardiola hnuaiah league title pahnih, German Cup, World Club Cup leh UEFA Super Cup champion mah se season hnuhnung pahnihah Champions League semifinal an paltlang lo.