Vaivakawn-in Ramhlun S an hneh, BVT an chak

Ramhlun South-in veng leh veng inelna football tournament NECS Cup-a an record duhawm tak an chhunzawm thei lo a, nimin khan Vaivakawn hneh loin quarterfinal-ah an tla. Lammuala quarterfinal match hnuhnung berah Bethlehem Vengthlang FC-in Chhinga Veng hnehin semifinal an lut ve bawk.

NECS Cup ṭantirh aṭanga champion rinkai ni pha ziah BVT leh Aizawl West aṭanga la dam awm chhun Vaivakawn ten Zirtawpni tlai dar 2:00-ah final luh an inchuh ang. Ningani tlai dar 2:00 hian Armed Veng leh Venghlui ten semifinal hmasa zawk an khel bawk ang.

Vaivakawn damna Dampuia

Ramhlun South-in squad ṭha tak nei mah se Vaivakawn-in an hlau lo a, ṭan phat aṭanga minute linaah Moody Lalawmpuia'n goal a khung a, minute 17-naah Aizawl FC winger Laldampuia hmangin goal hnihna a khung leh bawk.

Ramhlun South-in player an nei ṭha zawk tih a lang zui a, Pune Academy-a awm mek Lalawmpuia chuan hattrick siamin chak zawk tura ngaih an ni. Ramhlun South rawlthar AwP-a hi Dinthar FC tan a khel tawh a, I League U18 hnuhnung berah khan top scorer a ni.

Mamawh hunah Vaivakawn tan Dampuia a rawn pen chhuak a, minute 90-naah Dinthar FC winger hlui hian freekick
aṭangin siphurh sutna goal a khung. Penalty shootout-ah Vaivakawn an vannei zui a, 3-2 in an chak.

BVT hun?

Bethlehem Vengthlang-in veng leh veng inelnaah nomawi chawi an duh a, Ramhlun South an hneh theih loh avangin Vaivakawn chak hi BVT tan chanchin lawmawm a ni.

BVT tan Chhinga Veng FC-a khel Lalmawizuala'n goal hmahruai a khung a, Chhinga Veng-in Vanlallawma hmangin sut mah se hun tawpah BVT thiampuipa Laldingngheta a rawn inlar a. Santosh Trophy-a Mizoram winger Dingngheta hian minute 81-naah chakna goal a khung.

Nimin Inkhel Results

Vaivakawn 3 - 3 Ramhlun South

Vaivakawn : Moody Lalawmpuia 4'; Laldampuia 17', 90'

Ramhlun South : Lalawmpuia 21', 68', 77'

Penalty Shootout-ah Vaivakawn an chak

Chhinga Veng 1 - 2 Bethlehem Vengthlang

Chhinga Veng : Vanlallawma 48'

BVT : Lalmawizuala 26'; Laldingngheta 81'

Semifinal - Lammual

March 17, Ningani

02:00 PM Armed Veng Vs Venghlui

March 18, Zirtawpni

02:00 PM Vaivakawn Vs Bethlehem Vengthlang