US Open khel tur Djokovic

Novak Djokovic chuan US Open leh Western & Southern Open a khelh tur thu a puang chiang a, tun thla chhunga hard court inelna lian khelh turah hian champion tura rinkai a ni zui nghal ang.

World number 1 Djokovic chuan, "US Open leh Cincinnati Masters ka khel thei dawn tih ka sawi, hun harsa leh buaina hrang hrang leng kara hetiang thutlukna siam hi a harsa hle a, inlan thei tura ka awm erawh ka lawm takzet," tiin a sawi.

March thla aṭang khan tennis tournament an chawl lailawk vek a, tun thla aṭangin inelna ṭhenkhat chu an chhunzawm leh ṭan. US Open hi August 31 aṭanga khelh ṭan tur niin, Cincinnati Masters erawh hard court inelna lian atana inbuatsaih nan hman a ni ang.

US-ah coronavirus a la hluar a, a bik takin tournament khelhna tur New York khawpuiah hri kai an tam. Inelna buatsaihtu lamin player leh team tan dan zawm tur khirh tak an duang a, player langsar ṭhenkhat chu an inhnukdawk tawh.

Mipa champion lai Rafael Nadal a inlan dawn lo, Spanish tlangval hian September thla chawhnu lama khelh tur French Open atana inbuatsaihna neih ṭhat a duh vanga ngaih a ni. Grand Slam vawi 20 champion tawh Roger Federer pawh hliam vangin a inlan thei dawn lo.