Van Gaal a hnuaia tla tlum lo Falcao

Chelsea striker Radamel Falcao chuan Manchester United tana a khelh lai khan a beisei angin manager Louis van Gaal-a hnuaiah hmun a chan loh thu a sawi.

Colombia international hian September 2014 khan Monaco aṭangin United hi loan-in a zawm a, Premier League match 26 a inlana goal li a khung hnuah a ngheta lakluh theih ni mah se United hian a chet ṭhat tawk loh vangin an la lut duh lo.

Kum 30-a upa striker chuan, "Manchester-ah kha chuan thil hriatthiam a har em em. Vawiinah minute 60 ka khel a, naktukah minute 45, a tukah minute 20. Ka dinhmun kha hriatthiam a harsa a, coach-in engti turin nge min beisei tih pawh ka hrethiam ngai lo," a ti.

Tun season-a hliam vanga Chelsea tana la inlan tam lo tak striker chuan, "Regular taka inkhel ṭhin player ka ni a, ka khup hliam vanga ka buai hnuin United ka pan a, ka beisei ang hmun ka chang leh si lo," tiin Old Trafford-a a chet ṭhat loh chhan chu hmun a chan tam loh vang a nih thu a sawi chhuak.

Hetihlai hian Atletico Madrid striker hlui chuan United manager Louis van Gaal nen inhmuhthiam lohna engmah an neih loh thu a sawi.