Chhinga Veng-in phuba an la

Mapuia Cricket League (MCL) khelh mekah nimin khan Suaka Cricket Ground-ah round 3 khelh zawh a ni a, Chhinga Veng Cricket Club chuan an khingpui Kulikawn Cricket Club chu run 58-a hnehin an dinhmun an siam ṭha chho zel. Hetihlai hian 1st division champion lai Kulikawn erawh an dinhmun a chhe tawh hle.

Suaka Cricket Ground-a inkhelah hian toss-a vannei zawk Kulikawn-in vawm hmasak an thlang a, Kulikawn bowler-te'n hma takah Chhinga Veng top order-te vawm out-in an khel ṭha hle. Hetihlai hian Chhinga Veng tan an state pawn player Saidul Alam Faruk leh captain Jonathan Lalbiakkima-te chuan an dinhmun rawn siamṭha chhoin, Saidul hian ball 42 a hmachhawnah run 54 a vaw chhuak a, Jojo-a hian ball 29-ah run 38 vaw chhuakin a tawp thlengin a out lo. Chhinga Veng hian over 20 chhungin run 135 siamin wicket ruk an hloh. Hei hi target pangngai taka ngaih theih a ni.

Kulikawn bat hun a thleng a, an opening batsman pahnihte run siam miah loin an out ve ve. Hei hi nasa takin an inning kal chho zelah an tuar hle. Chhinga Veng tan vice captain C Lalrinsanga'n a vawm
ṭha takzet a, over li a vawmah run riat chiah pein Kulikawn batsman panga ngawt a vawm out. Kulikawn hian partnership mumal an nei hleithei lo a, a khat tawkin wicket an hloh reng a, over 18.1-ah run 77 chauh siamin an out fai vek.

Heti hian an match hmasabera chak loha bul ṭan Chhinga Veng chuan a zawnin chak result vawi hnih an hlawh chhuak leh ta. Hetihlai hian 1st division champion Kulikawn erawh vawi thum khelhah vawi thum an chak lo tawh a, an tan MCL-a kal chhunzawm zel turin beisei a chau tawh hle.

Vawiin aṭang hian fourth round khelh chhunzawm a ni lehnghal dawn a, vawiin hian match khat chauh awmin Suaka Cricket Ground-ah Armed Veng CC leh Chaltlang SC-te zing dar 10:30-ah an inhmachhawn dawn.