Srikanth a inhnukdawk

Indian shuttler Kidambi Srikanth chu tunkar chhunga khelh tur Swiss Open Grand Prix Gold-ah inlan tura ngaih ni tawh mah se inelna
ṭan a nih dawn hnaiah a inhnukdawk leh.

Srikanth hi Swiss Open-ah hian champion lai a ni a, a title humhim tura a inlan loh chhan chu March 29 aṭanga April 3 chhunga khelh tur India Open Super Series-ah insawrbing a duh vang niin a sawi.

World number 10 Srikanth chuan, "Swiss Open ka khelh loh tur chhan chu Indian Open atan inbuatsaihna ṭha leh hun thawl neih ka duh zawk vang a ni," tiin kumin January thlaa Syed Modi GP Gold title latu chuan a sawi.

Swiss Open-ah hian Indian shuttler lang-sar Saina Nehwal a inlan dawn thung a, world number 2 hi he hmunah hian vawi hnih a champion tawh. Ani bakah hian PV Sindhu pawh a inlan dawn a ni.