Champion kawng zawhtu Leicester City

Sum nei ngah apiang dinchanna anga sawi football khawvelah, khelh 30 hnuah club hausa ni ve lo Leicester City-in English Premier League-ah hma an la hruai zel!

Thawhṭanni zan khan King Power Stadium-ah minute 25-naa Shinji Okazaki-a scissors kick mawi tak hmangin Leicester City-in manager thar Rafael Benitez hnuaia khel Newcastle 1-0 in an hneh.

Foxes-in match 30-ah point 63 hmuin an hnuai chiaha awm Tottenham Hotspurs aiin point ngain an sang. Arsenal leh Manchester City ten match khata khel tlemin Claudio Ranieri hote an phak lohna hi point 11 leh 12 a ni.

Champion tum?

Inkhelh ṭan hmain Claudio Ranieri chuan Europa League khelh chu an tum a nih thu a sawi a, Italian manager hian season laihawl vel khan relegate loh an tum thu a sawi tawh bawk.

Amaherawhchu inkhelh tawp lama Ranieri-a'n player tiphur tura mipui a kar dan leh a chet dan thlirin Europa League ringawt an tum lo niin a lang.

Italian manager Ranieri chuan, "Newcastle-in manager thar hnuaia an khelh avangin khelh an harsa em em a, kan chak meuh kha chuan ka thawl hawkin ka hria. Match riat khelh tur a la awm a, theihtawp kan chhuah chhunzawm a ṭul a ni. Kan supporter-ten min chhuang a, kan chungah rinna an nghat ngam a, chu chu kan kal zel nan a pawimawh a ni. Kan vaiin kan thawk ho a, kan tum ram thleng tur chuan mimal tin an pawimawh a ni," tiin a hmabak apianga theihtawp chhuah an tum thu a sawi.

Nomawi inchuh

Southampton manager Ronald Koeman ngaihdan chuan Premier League nomawi inchuhnaah Gunners leh City an tel tawh lo a, Foxes leh Spurs te chauh chu champion thei an ni.

Dutch manager Koeman chuan, "Inkhelh ṭan hma kha chuan team panga lai pawh an champion theiah ka ngai a, amaherawhchu inkhelh banah erawh team pahnih chauhin nomawi an chawi thei tawhah ka ngai. Leicester leh Tottenham hian pakhatna leh pahnihna dinhmun an inchuh dawn," tiin Gunners leh City ṭantu tana hriat nuam lo thu a chhak chhuak.

Season liam taa bul ṭan ṭha Saints boss hian Foxes thil tawn mek hi a hriathiam pui a rinawm a, behchhan ṭha tak neiin ngaihdan a siam niin a lang bawk.

Leicester hi an elpui club dangte ang lo takin European competition-ah an tel ve lo a, FA Cup-a an tlakna a rei tawh avangin an squad chhah tawk lohna tun thleng chuan an chhiat phah lo.

Newcastle ve thung

Rafael Benitez-a hnuaiah Newcastle chak zo lo mah se Spanish manager hian a club thar hi hmun him lamah a hruai theih a inbeisei. Season tir a nih tawh loh avangin tunah chuan Leicester hneh loh hi a zahthlak tawh lo a, Premier League club dangte tih ṭhin dan ang tho a ni.

Newcastle hian bul an ṭan ṭha a, Okazaki hmanga goal an chhuah hnuah Ayoze Perez leh Moussa Sissoko te hmangin an sut teuh hle.

Liverpool leh Real Madrid manager hlui chuan, "Bul kan ṭan ṭha a, minti lawmtu tak erawh second half-a player-te rilru put hmang kha a ni. Chak tumin an khel a, theihtawp an chhuah a, season tharah Premier League kan khelh chhunzawm zel ka ring," tiin beisei a la neih san thu a sawi a, an khingpui manager Ranieri pawhin Newcastle hi an him a rin thu a sawi ve bawk.

Newcastle hian match 29-ah point 24 chauh an hmu a, table-ah 19-naah an awm mek. Benitez-a hote hian beisei tur an la nei a, 17-naa awm Sunderland chu khelh zat inangah point khat chiahin an pha lo.