Chhinga Veng chak chiang

2016 MFA Cup-ah nimin khan Aizawl DFA champion Chhinga Veng FC a vawi khatna atan an inlan a, Lawngtlai DFA aiawh Young Learner's FC chu 10-1 zetin an sawp. Inkhel dangah Siaha FC-in Rengtekawn FC 4-1 in an sawp ve bawk.

MPL5 khel tura inpetkai Chhinga Veng FC-in NECS Cup lama an veng LC team-in Be-thlehem VT an hma-chhawn avangin an ṭhat dan berin MFA Cup-ah bul an ṭan lo. Season tharah Chhinga Veng FC leh an veng innghahna khawtlang hruaitute nen thawhhona ṭha an nei dawn tih a hriat theih.

Player kim lo mah se Lawngtlai khaw club tan Chhinga Veng FC an lian lutuk hret a, Aizawl First Division League champion hian Lalthlamuana goal li bakah Lalhmunsiama, Hmingthanmawia Hmar, Vanlalhriata, B. Lalnuntluanga, Orvielle PF Todd leh Lalsawmzela te goal hmangin Young Learner's FC an sawp.

Kolasib hnuaia team ṭha bera ngaih Project Veng FC an inlan theih loh avangin an aiah Reng-tekawn FC chu MFA Cup-ah an inlan a, Siaha FC an khingpha lo. Siaha DFA aiawh hian Dinthar FC player hlui MC Malsawmzuala goal hnih bakah A. Beirokhai leh F. Beilyfa te goal hmangin Rengtekawn 4-1 in an hneh.