Champions League Dynamo nena inhnehtawk City-in quarterfinal lut
Manchester City-in an club chan-china a vawi khat nan Champions League quarterfinal an lut a, last 16 inkhel pahnih belhkhawmah Dynamo Kiev chu 3-1 in an hneh.
Thawhlehni zan khan Manchester City hian Ukrainian club hi an mikhual a, goal khung loin an inhnehtawk. Inkhel hmasa zawkah Manchester City hi 3-1 a an lo chak tawh avangin an khelmuala goal khung lo chungin an tlang ta tho a ni.
First half-ah team pahnihin goal hlauhawm an nei lo ve ve a, seocn half-ah erawh City tan Jesus Navas-a'n post a pet per bakah Yaya Toure chuan a hun ṭha neih a chhawr ṭangkai thei lo bawk.
Manchester khaw club-in quarterfinal lut mah se an lawm erawh a kim lo. Tlar--hnung lama an player pawimawh pahnih Vincent Kompany leh Nicolas Ota-mendi-te chu hliam vanga lakchhuah an ni.
Hmasawn ngai City
Season tharah Manchester City-in manager thar Pep Guardiola an nei tawh dawn a, season tawp ruala chhuak tur Manuel Pellegrini-a tan Champions League nomawi chawi chunga English club mangṭha hi duhthusam a ni ngei ang.
Thla hmasa khan City-in League Cup nomawi chawi mah se FA Cup-ah an tla tawh a, Premier League-ah hmahruaitu Leicester City chu point 12 laia an thlauh tawh bawk avangin season tira nomawi pali chawi tum club tan Champions League chiah beisei tur awm a ni ta.
Mahse, City-in kal zel an tum a nih chuan an insiamṭhat a pawimawh khawp ang. Sergio Aguero leh midfielder Toure-te'n Ukrainian club an hmachhawn
ṭumin an theihna an pholang thei lo a, quarterfinal chinah chuan club lian vek an hmachhawn tawh dawn avangin tun aia ṭha zawka an khelh a ngai ang.
Kompany tel loin
Manchester City tana pawi ber chu an first-choice centre-back pahnih inhliam hi a ni a, a pawina belhchhahtu chu captain Kompany-a'n a chawnah bawk hliam a tuar leh ta hi a ni.
Belgium international hian kum 2008-a City a zawm hnuin vawi 14 lai a chawnah hliam a tuar tawh a, tun season-ah hliam vanga a buai fo avangin City match 46 khelh tawhah vawi 19 chiah a inlan.
Kompany tel loa City tlarhnung hian sawisel a hlawh hle. Belgian defender kaihhruaina hnuaia City-in match an khelhah minute 156 dana goal chhuah ang an ni a, Kompany tel loin minute 70 dana goal chhuah ziah ang an ni thung.
City manager Manuel Pellegrini chuan, "Vincent hian a buai ṭhinna ngaiah tho hliam a tuar a, thla khat vel tal chu a chawlh a ngai dawn a ni," tiin a captain inhliam chungchang a sawi.
Nicolas Otamendi hliam erawh a na lutuk loa sawi a ni a, Pathianni zana Manchester United nen Derby match an khelh hunah a dam hman dawn leh dawn loh erawh a chiang lo thung.
Pellegrini thukhawchang
City manager Pellegrini chuan, "Tun hma zawnga kan la tih theih ngai loh kan tih avangin City tan chuan zanina hnehna kan chan hi a pawimawh takzet a ni. Tun ang level-ah chuan game awmze nei tak khelh a pawimawh tawh ṭhin a, he inelnaah hian kawng thui tak zawh turin hma kan sawn zel theih ka beisei a ni," tiin hmalam pana an kal zel tur thu a sawi.
Inkhel chhehvel
• Kum 19992-a European Cup tih ṭhin Champions League tia thlak a nih hnuah English club pasarihin quarterfinal an lut ta a, City hma hian Arsenal, Tottenham, Leeds United, Liverpool, Manchester United leh Chelsea-ten English club zingah quarterfinal an lo lut tawh.
• City-in Champions League match an khelh hnuhnung 10-ah Dynamo Kiev laka an goal chhuah loh hi an vawi khat chhuah lohna a ni.
• City tan Dynamo Kiev laka an goal khung loh hi Etihad Stadium-a Champions League match an khelh tawha goal an khung loh vawi khatna a ni.
• Manchester khaw club hian Dynamo Kiev nen an inhmachhawnna inkhel-ah hian goal zawnah vawi khat chiah an pet a, hei hi minute 73-naah chauh a la ni zui.