Sharapova leh UN inṭhen

Maria Sharapova-i'n infiammite tana dam-dawi hman phal loh 'meldonium' a hman thu a puan chuan nghawng a nei chho zel a, United Nations chuan Goodwill Ambassador chuan a nihna hi buaina a neih chhung chu an hlih sak.

Russian star hi kumina Grand Slam hmasa ber Australian Open-a Serena Williams a hneh loh hnua a dinhmun enfiah niin fiahna a paltlang zo lo a; International Tennis Federation (ITF) chuan March 12, Inrinni aṭang khan a chungah thu-nunna a lek kawh a ni.

United Nations De-velop-ment Programme chuan thuchhuah siamin, "Maria hi a thil tih dik loh chungchanga buaina a neih chhung chu tih tur kan lo ruahman sa leh hmachhawpah a inhnam-hnawih thiang lo ang," an ti.

Kum 1965 a din ṭan, khawvel pum huapa hna-thawk ṭhin United Nations Development Programme (UNDP) hi an hmunpui chu New York City-ah awm-in khawvel ram hrang hrang 170 zetah retheih-na chawi kang tur te, mitin kan in-tluk tlan theih nan leh inendawngna tibo tura hmalatu a ni.

Grand Slam vawi nga champion tawh Sha-rapova hian meldo-nium hi tunhma kum 10 liam ta aṭang khan a lo hman tawh thu a sawi a, he damdawi hi tunhma chuan hman phal loh zingah telh a ni ngai lo. Mahse, kumin January 1 aṭang khan World Anti-Doping Agency's (Wada) chuan khap zingah a telh thar thung.

Infiamna thawmhnaw siamtu lar Nike, Swiss rama sana siamtu lian Tag Heuer leh German car siamtu hlun Porsche te pawhin Sharapova nena an inzawmna an lo chhu chat tawh bawk.