T20 World Cup India an mualpho, Kiwis hmaah an zawr

Thawhlehni zan khan Twen-ty20 World Cup 2016 Super 10 match hmasa ber khelh a ni a, inelna thlengtu India chu New Zealand lakah run 47-a chak loin an mualpho chiang hle.

Vidarbha Cricket Associa-tion Stadium, Nagpur-a inkhel-ah New Zealand an bat hmasa zawk a, over 20-ah run 126 siamin mi pasarih an hloh. Kiwis batsman zingah Corey Anderson a khel ṭha ber a, ball 42 a hmachhawnah run 34 a siam tihin a out.

Kiwis batsman-te'n beisei an phak lo a, New Zealand innghahna Martin Guptill chuan run ruk chiah a siam hman tihin a out a, captain Kane Williamson chuan ball 16-a hmachhawnah run riat chiah a vaw chhuak thei bawk.

Indian bowler zingah che ṭha fal an awm lo a, Ravichandran Ashwin, Ashish Nehra, Jasprit Bumrah, Suresh Raina leh Ravindra Jadeja-te'n wikcet khat ṭheuh an la a, bowler beiseiawm Hardik Pandya-a'n wicket lak a nei lo thung.

India bat hun a thleng a, tun hnaia an khelh dan ngaihtuahin New Zealand target run 127 chu awlsam taka tlin thei mai tura beisei an ni.

Mahse, bowler-te hman thiam khelmualah Indian batsman
ṭha rual aiin Kiwis bowler-te an langsar zawk a, a pianna ramah New Zealand tana khel Indian tlangval Inderbir Singh Sodhi-a'n a pianna ram mipui a vel.

Ludhiana-a piang Ish Sodhi tia hriat lar bowler hian over li a vawmah run 18 chiah pein wicket thum a la a, a vawm out zingah India innghahna Virat Kohli-a vawm out chu a pawimawh hle.

New Zealand bowler zingah Mitchell Santner a che ṭha bawk a, Black Caps all-rounder hian India opening batsman Rohit Sharma a vawm out bakah captain Mahendra Singh Dhoni a vawm out bawk. Kum 24-a upa bowler hian over li a vawmah run 11 chiah pein wicket li a la.

Indian batsman zingah run siam hnem ber MS Dhoni chuan ball 30 a hmachhawnah run 30 a tlin hram a, Virat Kohli chuan run 24 a siam tihin a out bawk.

Yuvraj Singh-a'n tun hma a pha tawh lo niin a lang a, kum 34-a upa batsman India innghahna ni
ṭhin hian ball nga a hmachhawnah run li a vaw chhuak hram a, beisei a phak lo hle.

India khelhchhiat bul ṭanna erawh opening batsman pahnih Rohit Sharma leh Shikhar Dhawan-te an ni thung. Tun hnaia che ṭha thei tak Rohit Shar-ma hian ball sarih a hma-chhawnah run nga chiah a tlin thei a, Dhawan phei chuan ball thum chiah hmachhawn hmanin run khat chiah a siam.

Inelna thlengtu India hian over 18.1 an thlen meuh chuan batsman dang chhawr tur an nei tawh lo a, mi sawm hloh chungin run 79 an tlin hram.

Champion tura beisei kai ber India tan kalkawng a awlsam tawh dawn lo. Group 2-ah Aus-tralia, Bangladesh leh Pakistan hmachhawn tur an la nei dawn a, group khat aṭangin a sang pahnih chauhin semifinal an khel thei ang.

Nizan khan Pakistan leh Bangladesh bakah West Indies leh England an inkhel a, result erawh he chanchin buatsaih a nih lai hian kan hre hman lo.

Zanin dar 7:30-ah Sri Lanka leh Adfghanistan an inhmachhawn dawn bawk a, inkhel hi Star Sports 1-ah live-a en theih a ni ang.